Altin Vorpsi
Merkatoja e janarit mund të ndryshojë jo pak skuadrën e Mançester Sitit
Në vend të Balotelit do të vijë David Vija
“Etihad Stadium” mund të mos jetë më “shtëpia” e Mario Balotelit. Vetëm një ditë pasi komisari teknik i Italisë, Çezare Prandeli, pohoi se i riu është duke vënë në rrezik të ardhmen e vet si futbollit, erdhi edhe një tjetër goditje e rëndë në drejtim të “afrikanit”.
Pas gjobës
Pas hedhjes së klubit në gjyq nga sulmuesi për gjobën prej 400 mijë eurosh, mediat angleze raportojnë se pronarët i kanë kërkuar Mançinit që të mos e grumbullojë më lojtarin në skuadër, derisa ai të kuptojë se ka gabuar. Ashtu si ndaj Njukasëllit, sulmuesi italian pritet ta shohë nga shtëpia edhe ndeshjen e kësaj të shtune kundër Ridingut. Për “The Sun”, destinacioni më i mundshëm i ish-talentit të Interit është Milani, sepse ish-skuadra e tij preferon Paulinjon, Reali nuk e do, ndërkohë që në Rusi ekziston problemi i racizmit. Për ta hequr qafe që në janar, Siti do të kënaqej edhe me 13 milionë euro (edhe pse për ta transferuar në 2010-ën pagoi plot 28 milionë).
Nga Spanja
Që një lajm i tillë nuk mbetet në nivelet e spekulimit, kjo konfirmohet nga Spanja, sepse mediat iberike shkruanin se për të zëvendësuar Balotelin “qytetarët” do të hidhen në sulm për David Vijën. 31-vjeçari ka kohë që nuk është më zgjedhje e parë në “Kamp Nou”, sepse Vilanova u beson më tepër Pedros, Sançezit dhe Kristian Tejos. Ish-bomberi i Valencias është edhe një objektiv i Juventusit. Sulmuesi asturian mund të transferohet për një çmim të kënaqshëm në fund të sezonit, por largimi i Balotelit që në merkaton e dimrit mund ta afronte operacionin e Sitit që në janar. Sulmuesi spanjoll nuk dëshiron të largohet nga Spanja dhe është përfolur se mund të rikthehej në “Mestaja”, por Valencia nuk është gati t’i paguajë rrogën që përfiton te katalanasit, 4.5 mln euro në sezon. Te Siti ai mund të përfitojë akoma më shumë, aq më tepër që një lëvizje të tillë mund ta ketë këshilluar edhe Guardiola, një nga kandidatët për stolin e milionerëve në fund të sezonit.
