Datat për zhvillimin e konkurseve
Ditën e nesërme do të nisin konkurset në Universitetin e Arteve dhe në Universitetin Politeknik. Sipas zyrtarëve të të dyja universiteteve, është çdo gjë gati për të pritur kandidatët dhe për të mësuar emrat e të rinjve që do të studiojnë te Artet dhe te Arkitektura. Konkurset do të zgjasin deri në 6 shtator. “Në universitet ne konkurrojmë në 33 programe studimi në të tria fakultetet dhe konkursi zhvillohet në bazë të listave të aplikantëve nga formulari A2. Sivjet, ndryshe nga vitet e tjera, në muzikë, në të gjitha programet e studimit kemi konkurrentë, duke ditur se kemi të bëjmë me një informacion më të kompletuar, gjë që e kërkon zhanri i muzikës. Në të gjitha programet e tjera numri i aplikantëve është goxha i madh”, – thotë Erald Bakalli, zv.rektor i Universitetit të Arteve. Drejtuesit e Universitetit të Arteve thonë se kriteret përzgjedhëse do të selektojnë më të mirët. Ata që nuk e kalojnë me sukses këtë fazë, pavarësisht rezultateve të maturës, nuk e fitojnë të drejtën e studimit. “Jo çdokush që del fitues në Universitetin e Arteve mund të jetë fitues patjetër i shkollës sepse është edhe ai 30% ndonjëherë që ndreq ose prish punë për ndonjë konkurrent. Megjithatë duke pasur si kriter bazë krijimtarinë, talentin, ne nuk kemi pasur ndonjëherë një problematikë të tillë”, – thotë Bakalli. Ndërkohë, konkurse do të zhvillohen edhe në Universitetin e Sporteve në Tiranë por edhe në disa rrethe. Në Universitetin “Luigj Gurakuqi” në Shkodër dhe “Aleksandër Xhuvani” në Elbasan, në programin e studimit “Edukim fizik dhe Sporte” rezultatet e shkollës së mesme zënë rreth 50% të pikëve dhe po kaq edhe rezultatet e konkursit.
Datat e konkurseve
Universiteti i Arteve, Tiranë
-Fakulteti i Muzikës 2-6 shtator
-Fakulteti i Artit Skenik 2-6 shtator
-Fakulteti i Arteve Figurative 2-6 shtator
Universiteti i Sporteve, Tiranë
-Shkenca të Lëvizjes 2-4 shtator
-Fusha e Veprimtarisë Fizike të Shëndetit 2-4 shtator
Universiteti “Luigj Gurakuqi”, Shkodër
-Edukim Fizik dhe Sporte 2-4 shtator
Universiteti “Aleksandër Xhuvani”, Elbasan
-Edukim Fizik dhe Sporte 2-4 shtator
Universiteti Politeknik i Tiranës
-Arkitekturë 2-4 shtator
-Arkitekturë (Urbanis) 2-4 shtator
Universiteti “Aleksandër Moisiu”, Durrës (FASTIP)
-Menaxhim i Bankave 2-4 shtator
-Menaxhim Hoteleri-Turizëm 2-4 shtator
-Menaxhim i Ndërmarrjeve të vogla dhe të mesme 2-4 shtator
-Multimedia dhe Teknologji Informacioni 2-4 shtator
Akademia e Arteve, Shkodër
-Fakulteti i Muzikës 2-6 shtator
-Fakulteti i Arteve Figurative 2-6 shtator
Listën e plotë e gjeni në brëndësi të gazetës “Standard”
