Hapat kur nuk përcaktohet sipërfaqja. Dokumentacioni që duhet. Ligji i ri, duhen marrë firmat nga komshinjtë. Procedura e hipotekimit të apartamenteve
Pasuritë e paluajtshme, që nuk e kanë të përcaktuar sipërfaqen, të cilat ndodhen në zona kadastrale, për të cilat nuk ka përfunduar procesi i regjistrimit fillestar të pasurive ose ky proces është duke u zhvilluar, nuk mund të regjistrohen në një kartelë dhe hartë kadastrale në emër të pronarit, pa u zhvilluar më parë procedura e regjistrimit të tyre. Po kështu, të gjithë pronarët e tokave që zotërojnë Aktin e Marrjes së Tokës në pronësi, por që për shkak të mangësive të dokumentacionit apo gabimeve njerëzore gjatë marrjes së saj nuk kanë arritur ta hipotekojnë pronën, tashmë do të mund ta bëjnë këtë.
Procedura
Fillimisht duhet të verifikohet nëse Akti i Marrjes së Tokës në Pronësi përmban elementet e formës dhe përmbajtjes, si emrin dhe mbiemrin e përfituesit apo të përfaqësuesit të familjes bujqësore, përfituese të tokës bujqësore. Identifikimin e organit që e ka lëshuar Aktin, duke përfshirë nënshkrimin e kryetarit të komisionit të ndarjes së tokës. Të dhënat identifikuese të pasurisë, ku përfshihen sipërfaqja dhe lloji i tokës bujqësore. Vulën e komitetit ekzekutiv të fshatit ose Vulën e kryeplakut, Vulën e komunës/bashkisë ose Vulën e ndërmarrjes bujqësore ose Vulën e këshillit të qarkut. Kur pasuria nuk figuron në pronësi të mbajtësit të parë të titullit të pronësisë mbi tokën bujqësore, si pasojë e transaksionit të realizuar me të tretë ose e shpronësimit për interes publik të kryer, me përjashtim të kalimit të pronësisë nëpërmjet akteve të trashëgimisë, e reflektuar kjo në zyrat e regjistrimit të pasurive të paluajtshme, të tretët nuk ndalohen të kryejnë veprime, me përjashtim të rastit kur kjo pasuri krijon mbivendosje me një pasuri tjetër të paluajtshme, të cilat nuk rrjedhin nga e njëjta origjinë. Kur pasuria e fituar me AMTP figuron ende në pronësi të mbajtësit të parë të titullit të pronësisë mbi tokën bujqësore ose trashëgimtarëve të tij, zyrat e regjistrimit të pasurive të paluajtshme, në rastet e trajtimit të kërkesave për shërbim të subjekteve të ndryshme verifikojnë ligjshmërinë e regjistrimit të kryer dhe veprojnë, si më poshtë: Nëse rezulton se regjistrimi është kryer në përputhje me ligjin, atëherë vijohet me realizimin e shërbimit të aplikuar. Kur gjatë verifikimit rezulton se regjistrimi ka mangësi apo është kryer në kundërshtim me ligjin, konstatimet e kryera nga punonjësit, që përpunojnë praktikat, i referohen regjistruesit në formë të shkruar, duke treguar hollësisht mangësitë e konstatuara. Kur sipërfaqja e çdo pasurie e dhënë me AMTP del më e vogël ose më e madhe se sipërfaqja e kësaj pasurie, e dalë gjatë regjistrimit fillestar të pasurisë dhe e pasqyruar në kartelën e pasurisë, ZVRPP-ja, brenda 2 ditëve pune nga data e konstatimit, u drejtohet mbajtësit të parë të titullit të pronësisë dhe komunës/bashkisë për të bërë saktësimin e planvendosjes sipas sipërfaqes së çdo pasurie të dhënë në AMTP. Kur pasuria, në çastin e hyrjes në fuqi të këtij udhëzimi, nuk figuron e regjistruar në pronësi të përfituesit me ATMP, regjistrimi i saj do të bëhet gjatë procesit të regjistrimit fillestar sistematik të zonës kadastrale, ku ndodhet gjeografikisht pasuria. Me “kërkesë për regjistrim”, kur pasuria ndodhet në zona kadastrale, për të cilat ka përfunduar regjistrimi sistematik i pasurive, me “kërkesë për regjistrim në raste të veçanta”, kur pasuria ndodhet në zona kadastrale, ku nuk ka filluar procesi i regjistrimit sistematik të pasurive.
“Leja” nga komshiu
Në rastet kur në kufi të pronës, për të cilën është paraqitur kërkesë regjistrimi, janë prona shtetërore, si: rrugë, rrugica, sheshe publike, lulishte, ndërtesa publike etj., deklarata noteriale zëvendësohet nga konfirmimi zyrtar i dhënë nga institucioni, i cili është pronar apo administron pronën shtetërore. Rastet kur prona ka dy a më shumë bashkëpronarë Kur pronën kufitare e kanë në pronësi dy a më shumë bashkëpronarë, kërkuesi paraqet deklaratat noteriale të bashkëpronarëve, për të cilët është e mundur marrja e kësaj deklarate. Regjistruesi, nëse e gjykon të nevojshme, verifikon vërtetësinë e dokumentacionit të paraqitur nga kërkuesi. Për këtë qëllim, ai ka të drejtë të kërkojë dokumente nga të tretët, persona, fizikë ose juridikë, zyrat e noterisë dhe organe të administratës. Përveç verifikimit të vërtetësisë së dokumentacionit, nëse e gjykon të nevojshme, regjistruesi mund të urdhërojë verifikimin në terren të pasurisë, me një grup të përbërë nga të paktën, 2 punonjës hartografë të zyrës së regjistrimit, për të bërë matjet dhe për të hartuar dokumentet përkatëse, (planvendosje /genplan/ planrilevimi).
Dokumentacioni
-Aktin e fitimit të pronësisë, në rastet kur pasuria e paluajtshme regjistrohet për herë të parë, ose dokumentin e regjistrimit, në rastet kur pasuria e paluajtshme figuron e regjistruar në regjistrat hipotekorë
– një plan rilevimi të pasurisë së paluajtshme, të përgatitur nga një subjekt i licencuar për punime topografike apo nga Zyra e Regjistrimit të Pasurive të Paluajtshme, sipas kërkesës së të interesuarit
– deklaratën noteriale të pronarëve kufitarë, që vërtetojnë përmbajtjen e kërkesës për kufijtë e pasurisë, që pretendohet të regjistrohet
– dokumentacionin nga arkivi teknik i ndërtimit, që pasqyron hartografisht gjendjen e pasurisë që pretendohet, në rast se disponohet nga ky arkiv
– mandatpagesën e shpenzimeve të regjistrimit (tarifa, taksa, shpenzime të tjera, nëse ka të tilla).
Hipotekat për apartamentet
Në momentin kur do të ndërtohet një pallat, kompania ndërtuese i drejtohet Zyrës së Hipotekës, duke kërkuar regjistrimin e lejes së ndërtimit. Edhe kontratat e blerjes të lidhura midis kompanisë ndërtuese dhe qytetarëve regjistrohen automatikisht në hipotekë. Në këtë rast, do të jenë Noterët, pranë të cilëve do të lidhen marrëveshjet. Sipas ligjit, noterët do të kenë mundësi të futën në Regjistrin Elektronik të Pasurive të Paluajtshme duke regjistruar edhe marrëveshjet e lidhura në prani të tyre. Me regjistrimin e karabinasë në Hipotekë, investitori nga njëra anë i krijon mundësi vetës për ta përdorur atë si kolateral për të marrë kredi, por nga ana tjetër i krijon tepër lehtësi blerësit për të marrë hipotekën e apartamentit në tij. Në situatën kur karabinaja është regjistruar, blerësi i apartamentit do të ketë mundësi që në momentin e përfundimit të punimeve dhe marrjes së lejes së shfrytëzimit nga ana e pushtetit lokal, të aplikojë për marrjen e Certifikatës së Pronësisë mbi apartamentin, marrëveshja për të cilin ekziston në regjistrat e hipotekave.
