E parë nga këndvështrimi mashkullor, më poshtë do të shikoni të radhitura njëra pas tjetrës, shumicën e sjelljeve femërore më të përhapura dhe mbi të gjitha më imituese. Ai të adhuron!
Ti je fantastike dhe je vajza e duhur për të, ose më saktë do ishe e duhura deri në momentin që shfaqen ato defektet e pashmangshme, tipike femërore, që ia shtojnë gjithnjë e më shumë dëshirën për të ikur larg teje. Ja cilat janë ato gjëra të cilat e largojnë mashkullin nga një femër:
– Të folurit e tepërt: “Si të shkoi dita sot?” Nëse mashkulli ju bën një pyetje të tillë dhe ti fillon dhe nuk mbaron për tre orë me radhë, ai rrezikon që të kalojë në një kolaps nervor. Një gjë e tillë ndodh, jo sepse ai nuk është i interesuar që t’ju dëgjojë por sepse e vetmja veprimtari së cilës ai mund t’i kushtojë çdo sekondë të mundshme pa asnjë hapësirë boshe midis është “sporti”. Andaj kujdes mos e teproni duke folur shumë!
– Shoping-u: Blerja është një prej aktiviteteve më të parapëlqyera nga pothuajse të gjitha femrat. Por nëse jeni të shoqëruara edhe nga partneri juaj duke e tërhequr sa nga njëri dyqan në tjetrin, duke i konsumuar këpucët dhe duke e lodhur vazhdimisht me pyetjen “Si dukem?” mos u çudisni nëse në mbrëmje do ta shikoni vetëm duke shfryrë dhe gjithë turinj. Mbi të gjitha kini kujdes se mos harroni që t’i përgatisni edhe darkën përpara se të dilni!
– Të qani shpesh: Filmi romantik, një thua i prishur, parukierja që ka ngatërruar ngjyrën e flokëve, të gjitha kanë një zgjidhje të ngjashme, përfundon duke qarë në shpatullën e tij. Edhe pse ai mund t’ju ngushëllojë, duhet të merrni parasysh faktin se ndjehet sikur po mbytet në det, pa pasur asnjë njeri pranë që t’i hedhë një gomë shpëtimi.
– Të ndërhysh edhe aty ku s’të takon: Bëni pjesë në atë kategori femrash të cilat janë shumë posesive dhe që duan t’i kontrollojnë çdo aspekt të jetës dhe që përpara se t’i blejnë diçka nuk e pyesin fare por mendojnë në mënyrë absolute që kjo është më e mira? Një këshillë: Dilni përpara pasqyrës dhe përsërisni me vete: “Nuk jam mamaja e tij”, “Nuk jam mamaja e tij”.
– Ironia: Femrat shpesh e teprojnë me ironi. “Për çfarë po mendon?”, për pyetjen rituale të radhës, e cila ka si qëllim të zbulojë çdo detaj deri edhe atë më të voglin. Një gjë e tillë e bën partnerin tuaj shumë nervoz duke u munduar që të gjejë përgjigjen e saktë. Por ka edhe nga ata persona të cilët mund të përdorin një zgjedhje më të lehtë, duke iu dhënë një përgjigje shumë të thatë: “Asgjë”. Merreni në konsideratë edhe një përgjigje të tillë.
– Të varesh gjithmonë prej tij: Në fillimet e njohjes suaj, ti me siguri që i je dukur “vajza e mrekullive”. Në momentin që u dashurove fillove të ankohesh dhe të varesh prej tij, sa më shpejt duhet t’i jepni vetes një arsye për të ndryshuar, sepse ai nuk mund të jetë në çdo moment pranë jush, edhe në gjërat më të vogla.
– Të qenit xheloze: Mjafton vetëm fakti që ai të përmendi emrin e një vajze tjetër dhe ti në moment shikon fundin e lidhjes suaj. Ka edhe më keq, mendime të tmerrshme të kalojnë në mendje dhe nuk mundesh që ta shikosh më si “besnikun” që gjithmonë do të doje të ishte apo që me të vërtetë mund të jetë. Nëse vazhdoni në këtë rrugë, ndarja me siguri që nuk do të vonojë.
– Të flasësh keq për vajzat e tjera: Nuk mund t’i bësh një vajze tjetër një kompliment, pa i shtuar edhe diçka të keqe, dhe si përfundim ti je më e mira. Kini kujdes, sepse nëse krahasoheni me çdo femër të bukur që ju kalon përpara dhe përpiqeni që vetëm t’i nxirrni në pah edhe ato defekte që ajo nuk i ka fare, të jeni e bindur, që ai do të zgjedhë pikërisht atë tjetrën!
– Të hiqesh sikur je perfekte: Është njëra prej gjërave që i bën meshkujt më nervozë. Ju vërtet mund të jeni një femër e suksesshme por kjo nuk do të thotë që t’ia kujtoni çdo sekondë dhe për më tepër t’i shtoni vetes edhe faktin e të qenit perfekte. Mundohuni ta evitoni, pasi që kjo gjë u shkon së tepërmi në nerva të gjithë meshkujve, shkruan zeri.info.
Shumë njerëz bien në dashuri me aromën e dikujt…!
Nuhatja e partnerit të ardhshëm mund të jetë mënyra ideale për të zbuluar dashurinë e vërtetë. Sipas shkencëtarëve, kundërmimi i një personi mund të zbulojë nëse ai ka apo jo shëndet të mirë, duke nënkuptuar se aroma mund të jetë e rëndësishme në zgjedhjen e një partneri. Për të testuar teorinë, u organizua një natë shkencore e takimeve të shpejta, pjese e Festivalit Ndërkombëtar të Shkencës në Edinburg, duke u dhënë mundësi pjesëmarrësve të nuhasnin njëri-tjetrin për të kontrolluar gjendjen e tyre shëndetësore. Zoologu dr. Cromier tha: “Të gjithë e mendojnë për dashurinë me shikim të parë, por përfshihen edhe shumë gjëra të tjera, ku aroma është ndër më të fuqishmet. U bë një test takimesh të shpejta ku u testuan aroma dhe tingujt. Njerëzit i patën sytë e lidhura dhe nuhatën krahët e të huajve, më pas zgjodhën aromën e atij që pëlqenin më shumë”. Shumë njerëz bien në dashuri me aromën e dikujt dhe kjo bëhet si drogë. Arsyeja është e ashtuquajtura vendi MHC i gjenit. Ky është një gjen kompleks që përcakton aromën e dikujt.
