Nga taksa e ndërtesës te ajo e makinave të përdorura, ja çfarë duhet të paguajnë qytetarët

Në Tiranë janë disa taksa që aplikohen nga Bashkia e Tiranës, midis të cilave, taksa e ndërtesës, e makinave të përdorura dhe taksa për kalimin e pasurive të paluajtshme.

Taksa e ndërtesës

Baza e taksës mbi ndërtesat është sipërfaqja e ndërtimit në metër katror e ndërtesës ose e pjesës së saj, mbi dhe nën nivelin e tokës dhe për çdo kat. Sipërfaqja në pronësi të taksapaguesit përcaktohet sipas dokumenteve që e vërtetojnë këtë pronësi. Në parashikimin e të ardhurave nga taksa e pasurisë, është gjykuar që vlera e mundshme për t’u arkëtuar nga taksa të rritet mesatarisht me 1%, për vitet 2015-2017. Faktorët që u morën në konsideratë në parashikimin e kësaj takse, janë:

-Rritja e nivelit të taksës për kategorinë e biznesit me dyfishin e ekzistueses por dhe lehtësimin me -30% të këtij niveli të rritur, me miratim të Këshillit Bashkiak

-Shtimi i një nënkategorie në kategorinë familjar për banesat jo të para, me detyrimin sa dyfishi i taksës për banesën e parë.

-Rritjen e numrit të pronave të evidentuara për qëllime biznesi

-Saktësimi i sipërfaqeve ekzistuese si dhe evidentimi i sipërfaqeve të reja për pronat me aktivitet biznesi

-Bashkëpunimi efektiv me ZVRPP, për një ndjekje sa më operative të pasqyrimit të veprimeve mbi regjistrimin dhe lëvizjen e pronave në qytetin e Tiranës.

Ndryshimet në Paketën Fiskale, diktuan edhe ndryshime në nivelin e Taksës mbi ndërtesat. Ndërkohë tatimpaguesit që kanë në pronësi më shumë se një banesë, për shtëpinë ku kanë banimin e zakonshëm paguajnë taksën e ndërtesës sipas nivelit ekzistues, ndërsa për shtëpitë e tjera sa dyfishi i taksës së ndërtesës. Agjent tatimor për vjeljen e taksës mbi ndërtesën për kategorinë “Ndërtesa Banimi” është Njësia Bashkiake. Njësitë Bashkiake janë përfituese të vlerës së 10% të shumës së arkëtuar.

Struktura e ngarkuar për vjeljen e taksës mbi ndërtesat për kategorinë “Ndërtesa të Tjera” është Drejtoria e Përgjithshme e Taksave dhe Tarifave Vendore.

Në parashikimin e të ardhurave nga taksa e pasurisë, nga kalkulimet na rezulton se të ardhurat nga kjo taksë do të rriten mesatarisht me 1% në vit për çdo vit pasues.

Taksa për pasuritë e paluajtshme

 Taksa mbi kalimin e së drejtës së pronësisë për pasuritë e paluajtshme vendoset për ndërtesat dhe të gjitha pasuritë e paluajtshme në çastin e kalimit të së drejtës së pronësisë mbi to.

Agjenti tatimor për vjeljen e taksës mbi kalimin e së drejtës së pronësisë për pasuritë e paluajtshme është Zyra Vendore e Regjistrimit të Pasurive të Paluajtshme, e cila në rolin e agjentit të taksës përfiton 3% të shumës së arkëtuar.

Taksa vjetore e mjeteve të përdorura

E ardhura nga taksa, mblidhet nga strukturat e Drejtorisë së Përgjithshme të Shërbimeve të Transportit Rrugor (drejtoritë rajonale) para kryerjes së kontrollit teknik vjetor të detyrueshëm të mjetit. Procedura e ndarjes së të ardhurave me buxhetet e njësive të qeverisjes vendore përcaktohet me vendim të Këshillit të Ministrave, bazuar në numrin e mjeteve të regjistruara sipas njësive të qeverisjes vendore por e konvertuar në përqindje, në masën 18% e të ardhurave vjetore mbasi është zbritur vlera e 5% që i takon agjentit tatimor DPSHTRR.