Entela Tabaku
I
më vjen kajherë një dëshirë
e marrë
me t’i lexu mendimet
me ta shtypë rrudhën midis syve
me gishtin e madh
e me ta hapë ballin si me sustë
me e futë kryet në langjet e trunit tand
e me t’i mendu mendimet
si i mendon ti
ose ma mirë me u zhytë
krejt
me u fundosë me një gur në qafë
me u mbytë në ta
e mos me dalë ma
II
më vjen kajherë një dëshirë
e marrë
me të hy në zemër
me ta hapë kafazin e kraharorit
me t’u futë në gjoks
e me ta pulsu gjakun
si e pulson ti
ose ma mirë me më marrë gjakut jot me vedi
me u zhytë
krejt
me humbë
me u mbytë në të
e mos me dalë ma
III
më vjen kajherë një dëshirë
e marrë
me t’u veshë në duer
si dorcë e hollë
e tejdukshme
dhe me e prekë botën me gishtat tuej
me t’i ndie ndjesitë
si i ndien ti
ose ma mirë me u shpërvjelë në ty
krejt
me t’u ba lëkurë
me t’u mbështjellë poresh
me u mbytë në to
e mos me dalë ma
IV
më vjen kajherë një dëshirë
e marrë
me t’u futë në krye
e me t’i mendu mendimet
si i mendon ti
me të hy në zemër
e me ta pulsu gjakun
si e pulson ti
me t’u përveshë në gishta
e me e prek botën
si e prek ti
më vjen kajherë një dëshirë
një poezi
më vjen me u mbytë në të
krejt
e mos me dalë ma
(shkurt 2015)
