Tretet si kripa në ujë partia Çame e Shpëtim Idrizit. Pas Dashamir Tahirit në Vlorë në krah të së djathtës është rreshtuar dhe deputeti tjetër i PDIU-s Tahir Muhedini. Shpëtim Idrizi mbetët vetëm me “Qifen” e Elbasanit dhe “Omerin” e Fierit. Deputeti çam i Tiranës ka qenë në krah të kandidatit të djathtë Halim Kosova gjatë promovimit të Librit të bujar Kapexhiut. Shpëtim Idrizi e mori mandatin e deputetit nga Partia Demokratike, mirëpo me daljen në opozitë të së djathtës në 2013 ai iu bashkua të majtëve të kryeministrit Rama. Një lëvizje e tillë pragmatiste dhe për interesa personale nuk u prit mirë nga degët lokale të PDIU-së dhe nga dy prej deputetëve të saj. Një çarje e tillë pritet t’i sjellë shume firo elektorale në 21 qershor partisë së Shpëtim Idrizit.

Akuzat, për para të pista/ Bogdani: Veliaj shpenzoi 200 mijë euro spote për dy ditë

Sa më shumë afron 21 qershori, aq më shumë shtohen shpenzimet e dëshpëruara të kandidatit rilindas për Tiranën, për spote e reklama televizive

200 mijë euro për dy ditë kjo është kostoja që opozita thotë se po paguan për dy ditë kandidati i majtë për bashkinë e Tiranës Erjon Veliaj. Selia Blu i kërkoi të bëjë transparencën, burimin e këtyre parave zotit Veliaj. Në një deklaratë të deputetit Gerti Bogdani u shpreh besimi se qytetarët e Tiranës do e ndëshkojnë me votë në 21 qershor modelin që ka vetëm fjalë dhe spote televizivë. “Sa më shumë afron 21 qershori, aq më shumë shtohen shpenzimet e dëshpëruara të kandidatit rilindas për Tiranën, për spote e reklama televizive. 202 mijë euro për dy ditë shpenzon Erion Veliaj vetëm për spote, ndërkohë që mijëra familje në Tiranë e në mbarë vendin mezi mbyllin muajin dhe janë zhytur në borxhe për bukën e gojës”. Bogdani i kujtoi Veliajt detyrimet ligjore dhe morale që ka për tu thënë qytetarëve se ku i ka gjetur financimet për të harxhuar shuma kaq të mëdha. Javët e fundit bashkëshortja e Erjon Veliajt është lidhur me akuza nga Partia Demokratike si përfaqësuese e biznesmenit gjeorgjian Dzanazhvilli i akuzuar për pastrim parash. Vetë zoti Veliaj i ka quajtur si shpifje fushate, ndërkohë qe opozita ka publikuar fakte që tregojnë se bashkëshortja e kandidatit të majtë për Tiranën ka qenë përfaqësuese ligjore e biznesmenit të akuzuar për pastrim parash. ‘Kemi besimin se qytetarët e Tiranës e kanë të qartë këtë gjë dhe me datë 21 Qershor do të marrin vendimin e duhur dhe do t’i japin gjykimin e duhur. Edhe 4 ditë! Sepse nuk mund t’i besojmë votën dhe të ardhmen një njeriu që punën e bazon vetëm në reklama dhe reklamat vetëm në gënjeshtra”.

 

Nebiaj: Dyshja Rama Meta po planifikojnë manipulimin e zgjedhjeve

Selia blu ka akuzuar dyshen Rama Meta se po hedhin në erë procesin e zgjedhjeve të 21 qershorit. Nëpërmjet një deklarate për mediat zëdhënësja Ornela Nebiaj numëroi disa nga incidentet që rrezikojnë të prishin zgjedhjet në 21 qershor. “E mbërthyer nga ankthi i humbjes së zgjedhjeve, dyshja Rama-Meta po intensifikon këto ditë shkeljet e ligjit dhe aktet e rënda të cenimit të standardeve të zgjedhjeve të lira e të ndershme. Në Kolonjë strukturat e PS dhe LSI janë sulur me kamionë me ndihma. Ja ku kemi fotot që e dëshmojnë këtë rast. Vora mbetet kampione e shkeljes së ligjit, ku strukturat shtetërore dhe kriminale të Ilir Metës kanë rrethuar shtabin e kandidatit Ismailaj, Në Durrës, personat e shpallur në kërkim nga policia për ngjarjet e rënda në Sukth, janë çdo ditë në krah të kandidatit Dako në takimet e tij elektorale”. Këto dhe raste të tjera ku janë përfshirë punonjës të policisë së shtetit dhe Interpol Tiranës janë disa nga akuzat e opozitës. Nebiaj i bëri thirrje prokurorisë të veprojë, si dhe organizmave ndërkombëtar të ndërhyjnë për të ndalur masakrën elektorale të planifikuar sipas saj nga dyshja Rama Meta.