Dy persona janë arrestuar në flagrancë nga Policia e Shkodrës ditën e djeshme pasi nga kontrolli, atyre u është gjetur një pistoletë dhe disa doza drogë. Në kushtet e flagrancës, u arrestuan Gëzim dhe Sokol Bajraktari, përkatësisht 53 dhe 24 vjeç, të dy banues në Shkodër. Arrestimi i këtyre shtetasve u bë pasi në një ambient në pronësi të tyre, nga kontrolli i ushtruar nga forcat e Policisë të Komisariatit Shkodër, ju gjetën dhe u sekuestruan në cilësinë e provës materiale, 1 armë zjarri pistoletë, me mbishkrimin “GAP Kol 8 mm K Made in Italy”, si dhe 36 qese farmaceutike të mbushura me 49.8 gr. lëndë narkotike e llojit kanabis. Materialet në ngarkim të tyre i kaluan Prokurorisë së Rrethit Gjyqësor Shkodër, për veprat penale “Prodhimi dhe shitja e narkotikëve në bashkëpunim”, “Prodhimi dhe mbajtja pa leje e armëve luftarake dhe e municionit”.
