Sërish incidente sapo Kryeministri Edi Rama ka dalë nga Bashkia e Shkodrës, ku pati një takim me kryebashkiaken Voltana Ademi. Banorët që e prisnin jashtë Bashkisë u afruan sërish për ta takuar.
Janë banorët që protestojnë për pjesën e mbetur të dëmshpërblimeve nga përmbytjet e vitit 2010 dhe banorët që u shemben shtëpitë nga ndërtimi i stadiumit ‘Loro Boriçi’.
Sapo doli nga Bashkia, protestuesit iu afruan Kryeministrit duke i kërkuar llogari, kurse Rama u shpreh se stadiumi do të ndërtohet sipas rregullave të UEFA-s dhe banorët do të dëmshpërblehen për banesat që do t’u prishen.
“Qeveri e korruptuar, duam paratë për përmbytjet”, reaguan banorët e përmbytur në vitin 2010.
Banorët u ndaluan nga Garda kur tentuan t’i afroheshin dhe të ndalonin Kryeministrin, kurse disa prej tyre janë shoqëruar në komisariat.
