Një ngarkesë prej 5 kg lëndë narkotike e llojit heroinë është sekuestruar në pikën doganore të Kakavijës. Policia informon se droga u gjet në automjetin tip Benz me targa AA 848 AL që drejtohej nga Agron Allkaj 56 vjeç banues në Fier.
Pakot e drogës të mbështjellë me natriban ishin fshehur në brendësi të mbështetëseve të sediljeve të shoferit dhe të pasagjerit.
Menjëherë kanë bërë bllokimin e mjetit duke njoftuar grupin hetimor si dhe Specialistët për Narkotikët në Drejtorinë Vendore të Policisë Gjirokastër.
“Gjatë kontrollit të imtësishëm nga grupi hetimor, i’u gjetën të fshehura pas sediljeve të shoferit dhe pasagjerit 14 pako të mbështjella me natriban, brenda të cilave dyshohet të kenë lëndë narkotike e llojit Heroinë, në peshën totale rreth 5 kg “ thuhet në njoftimin e policisë.
Këto pako u sekuestruan në cilësinë e provës materiale së bashku me automjetin ku u gjet lënda narkotike.
Gjithashtu u bë arrestimi në flagrancë i drejtuesit të mjetit, Agron Allkaj për veprën penale “Trafikimi i narkotikëve”, parashikuar nga neni 283/a i Kodit Penal.
Materialet procedurale do t’i referohen Prokurorisë së Krimeve të Rënda Tiranë.
Së bashku me drejtuesin e automjetit udhëtonin dhe 2 shtetas të tjerë të cilët u shoqëruan në Drejtorinë Vendore të Policisë Gjirokastër për verifikim nëse kanë ose jo lidhje me këtë trafikim.
