U arratis nga burgu i Trikalasë, Prokuroria kërkon dënimin e Ilir Kupër me burg përjetë

Prokuroria e Krimeve të Rënda ka kërkuar dënimin me burgim të përjetshëm për Ilir Kupën, emër i njohur i botës së krimit.Masa e dënimit për Kupën është kërkuar për arratisjen e tij nga burgu grek i Trikalasë, por për shkak të gjykimit të shkurtuar dënimi zbret në 25 vjet burg. Ndërkohë, në një proces tjetër Kupa akuzohet për grabitje si pjesëtar i bandës së babagjyshëve. Drejtësia greke transferoi dosjen e dënimeve për Ilir Kupën në Shqipëri dhe kërkon njohjen e vendimit të dënimit me 56 vjet burg.  Autoritetet e drejtësisë greke kërkuan njohjen e dënimit të Ilir Kupës dhe vuajtjen e dënimit të mbetur në Shqipëri.  Sipas materialeve të ardhur nga Greqia, thuhet se Ilir Kupa ëshë dënuar 3 herë për 8 grabitje me armë e dhunë, duke u dënuar me një dënim të vetëm prej 56 vitesh burg. Në vendimin e dënimit ndër të tjera thuhet se Kupa së bashku me persona të tjerë, të identifikuar dhe dënuar në Greqi, grabisnin vila dhe banesa. Në vendim, thuhet se grabitësit ishin të armatosur me armë, thikë, kaçavidë apo sende të forta, ku dhunonin deri në plagosje pronarët e shtëpisë dhe më pas i grabisnin sendet me vlerë, paratë apo bizhuteritë. Në vendim, Ilir Kupa cilësohet si një person me rrëzikshmëri të lartë shoqërore, pasi në 8 rastet e grabitjeve ishte i dhunshëm. Për këto grabitje, i pandehuri që po gjykohet në Shqipëri si pjesë e një “bande” që kryenin grabitje me armë, është dënuar në tre procese të ndryshme në total me 56 vjet burg.  Por, në mars të 2013 Ilir Kupa së bashku me 10 të dënuar të tjerë shqiptar, thyen sigurinë e burgut të Trikalas dhe u arratisen. Gjatë kësaj arratisje disa nga të burgosurit shqiptar u vranë në shkëmbim zjarri me policinë greke dhe disa të tjerë u arrestuan ndërsa Ilir Kupa arriti të hynte në Shqipëri. Disa muaj pas arratisjes Kupa është arrestuar në Tiranë për armëmbajte pa leje, por më pas rezultoi se është një nga grabitësit e disa bizneseve në Shqipëri. Në momentin e arrestimit, ai akuzoi drejtësinë greke për dënime ekstreme dhe të padrejta ndaj shqiptarëve, duke kërkuar mos të ekstradohet në Greqi. Kjo kërkesë, siç duket ju plotësua pasi drejtësia greke solli vendimin e dënimit për njohje në Shqipëri, ku pritet që nga 56 vite burg, dënimi t’i konvertohen në Shqipëri me 25 vite. Kjo për shkak se ky është dënimi maksimal i Kodit Penal në veprat e tilla penale për të cilat ai është dënuar në Greqi