Dikush në komisariat kishte hequr spinën e pajisjeve regjistruese. Kështu u justifikua personi përgjegjës për kamerat e sigurisë në Komisariatin e Laçit, Rasim Breçaj. Në dëshminë që dha në sallën e gjyqit, ai deklaroi se ditën e konfliktit, kamerat e sigurisë kanë qenë të fikura.
“Unë jam vënë në dijeni 5 ditë pas ngjarjes dhe pas verifikimit vura re që sistemi nuk ishte prishur, por i ishte hequr spina” tha Breçaj.
Komisariati ka një sistem kamerash bardhezi të vitit 2000, të cilat regjistrojnë ne kaseta. Në seancën ndaj Armando Prengës sot ka dëshmuar edhe efektivi i sallës operative Bujar Hadëraj. Ai tregoi se Gjok Cali e kishte njoftuar në orën 23:40 duke i thënë se ishte goditur me qytë arme nga deputeti Armando Prenga.
“Cali u soll në komisariat, më pas u dëgjuan të shtëna. Të shtënat ishin jashtë komisariatit të kurbinit. Cali ishte në zyrën time, kur u dëgjuan të shtënat”, tha efektivi.
Seanca e radhës për çështjen “Prenga” do të zhvillohet në 16 maj ku do të dëshmojnë efektivët e tjerë. Deri tani shefat e komisariatit dhe efektivët e policisë ose nuk kanë parë gjë nga plagosja, ose kanë dëshmuar në favor të deputetit Armando Prenga. Ai është i lirë, ndërkohë që personat që mbetën të plagosur mbahen të izoluar në qeli.
