Marjan Rroku, ish-agjenti i Shërbimit Informativ Shtetëror që 15 vite më parë vrau me armën e shërbimit Alda Canaj studente 20-vjeçare dhe mamanë e saj Mbarime Canaj, humb betejën ligjore për tu liruar nga burgu e po ashtu, edhe të drejtën që procesi gjyqësor ndaj tij të zhvillohet nga e para.
Gjykata Kushtetuese ka refuzuar të pranojë kërkesën e tij duke lënë në fuqi dënimin me burg përjetë për vrasjen e dyfishtë më 17 shkurt 2001. Report Tv ka mësuar ekskluzivisht nga burime pranë Gjykatës Kushtetuese se vendimi është marrë më 30 mars 2016 dhe ky vendim mban nr.47.
Prej më shumë se një dekadë nga krimi makabër, Rroku u fsheh në Shtetet e Bashkuara të Amerikës nga ku u ekstradua. Më 9 shkurt 2016 Rroku ju drejtua Gjykatës Kushtetuese ku kërkoi rihapjen e procesit gjyqësor ndaj tij, proces i cili kish kaluar të gjitha fazat e gjykimit dhe prej 2 Majit 2002 ndaj tij rëndonte dënimi me burg përjetë.
Por dhe pse i dënuar me burg përjetë sapo u ekstradua nga Amerika Rroku nuk ndali betejën ligjore dhe trokiti fillimisht në Gjykatën e Lartë duke kërkuar rekurs për dënimin ndaj tij. Me vendim të datës 16 korrik 2015 ndaj Rrokut u la në fuqi dënimi burg përjetë dhe ai u vendos në një burg të sigurisë së lartë.
Por nga ky burg historia e tij u rihap pasi në emisionin e moderatorit Ardit Gjerbrea në televizionin kombëtar Klan Rroku u shfaq pas shumë e shumë vitesh këtë herë i përlotur për çfarë kish bërë duke rihapur dhimbjen e familjes Cani. Ai deklaronte në intervistë se Aldën e dashuronte por krejt e kundërta u tha nga motra e Aldës, Ornela e cila ishte personi që bëri çmos që Rroku të gjendej në Amerikë ku fshihej me identitetin Toni. Kjo intervistë u transmetua si diçka normale por fakti se ajo u dha 18 ditë pasi Rroku kish depozituar në Kushtetuese një kërkesë bëri që mbi të hidhen hije dyshimi.
Ishte babai i Alda Canit i cili paditi në gjykatë Ardit Gjebrean dhe Tv Kombëtar Klan për transmetimin e intervistës së Marjan Rrokut. Më 25 Prill Faslli Canaj trokiti në gjykatën e Tiranës me një padi civile me objekt “Fyerjen” ku të paditur janë drejtuesi i emisionit “E Diela Shqiptare”, Z. Ardit Gjebrea , Televizioni Klan.
Pas shortit ky proces gjykohet nga gjyqtari Martin Deda dhe më 26 Maj 2015 pritet seanca e parë. Faslli Canaj në padinë e tij pretendon se dikush ka paguar para për realizimin e kësaj intervistë e cila deformoi faktet e një krimi që ka lënë pasoja në familjen Canaj.
