Një ditë pas plagosjes së një të dënuari në burgun e Vaqarrit, policia e Tiranës zbardh ngjarjen dhe vë në pranga 2 autorët e dyshuar të saj. Sipas të dhënave zyrtare mësohet se shtetasi kosovar që mbeti i plagosur, Lili Dulaj nuk ka qenë shënjestra e këtij atentati dhe se krimi ka ndodhur për gjakmarrje. Ndërkaq mësohet se dy të arrestuarit janë Ergys Kolaveri, 25 vjeç dhe Enea Ceka, 24 vjeç, banues në Tiranë.
*** Specialistët e Sektorit për Krimet e Rënda ndaj Jetës dhe Pronës në bashkëpunim me Prokurorinë e Rrethit Tiranë, bënë të mundur identifikimin dhe kapjen e personave të dyshuar për plagosjen e ndodhur në I.E.V.P. Vaqarr. Më datë 30.07.2016, rreth orës 16:30, në ambientet e ajrimit, brenda I.E.V.P, Vaqarr, Tiranë, është plagosur me armë zjarri në pjesën e këmbës shtetasi Lili Dulaj, i dënuar më parë në shtetin e Kosovës, për shkelje të rregullave të qarkullimit rrugor dhe aktualisht i ndaluar me masë sigurimi “Arrest në burg”, për veprën penale “Dhunë në familje”. I cili ndodhet në Spitalin Ushtarak jashtë rrezikut për jetën. Nga hetimet ka rezultuar se ky person është goditur nga një distancë e konsiderueshme jashtë mureve rrethuese të këtij burgu dhe ndaj tij dyshohet se është qëlluar me një armë zjarri. Gjatë veprimeve të para hetimore, ka rezultuar se, shtetasi Lili Dulaj nuk ka qenë shënjestra e këtij atentati, pasi shënjestër ka qenë shtetasi Gazmir Daci, i cili ndodhet në masën arrest në burg, për veprat penale “Vrasje me dashje”, “Vrasje e ngelur në tentativë” dhe “Armëmbajtje pa leje”, pasi ky shtetas më datë 04.11.2015, pas një konflikti të mëparshëm, ka vrarë me armë zjarri shtetasin Valmir Kolaveri dhe plagosur rëndë vëllain e tij Robert Kolaveri, i cili aktualisht është i paralizuar. Nga verifikimet e kryera, ka rezultuar se nga vendi i ngjarjes është larguar me shpejtësi një automjet tip “Mercedes Benz” Vito ku nga verifikimet rezulton posedues shtetasi Ergys Kolaveri, vëllai i Valmir dhe Robert Kolaveri. Në momentin e kapjes së tij, ai ka qenë së bashku me shtetasin Enea Caka, kushëri i tij. Gjatë kontrollit të mjetit në pjesën e poshtme të sediljes së automjetit janë gjetur një palë dylbi për pamje në largësi, të cilat janë sekuestruar në cilësinë e provës materiale. Sa me sipër, u be arrestimi në flagrancë për shtetasit:
– Ergys Kolaveri, 25 vjeç, banues në Tiranë;
– Enea Ceka, 24 vjeç, banues në Tiranë; Materialet procedurale i kaluan Prokurorisë së Rrethit Gjyqësor Tiranë, për veprat penale, “Vrasje për gjakmarrje në tentativë” dh“Armëmbajtje pa leje”, në ngarkim të shtetasit Ergys Kolavari dhe “Moskallëzim i krimit”, në ngarkim të shtetasit Enea Ceka. Grupi hetimor po vazhdon punën për sqarimin e gjithë dinamikës së ngjarjes dhe autorëve të tjerë të mundshëm të përfshirë në këtë vepër penale.
NGJARJA Valmir Kolaveri u vra nëntorin e vitit të kaluar në Kamzë, ndërsa Gazmir Daci u arrestua 1 muaj më pas si autor i kësaj ngjarjeje. Daci akuzohet për vrasje në rrethana cilësuese, armëmbajtje pa leje, falsifikim dokumentesh dhe kanosje. Sipas dosjes së prokurorisë, në mbrëmjen e datës 4 nëntor 2015, rreth orës 18.00, Gazmir Daci ka qenë duke udhëtuar me mjetin e tij privat të markës BMW X5, në rrugën “Demokracia” në Kamzë, në afërsi të një njësie tregtare. Ai ka hasur në rrugë, po me një mjet BMW X5 Robert Kolaverin. Për shkak të konflikteve të vjetra të sipërpërmendurit kanë ndaluar mjetet pranë njëri-tjetrit dhe Gazmir Daci ka zbritur prej tij dhe me një armë të tipit pistoletë në dorë, ka shkuar në drejtim të mjetit, ku ndodhej Robert Kolaveri. Në momentin e përballjes fizike janë konfliktuar me njëri-tjetrin me fjalë dhe në prag të përfundimit të konfliktit, Gazmiri e ka kanosur për vrasje Robertin. Konflikti nuk është nxitur më tej nga Robert Kolaveri, pasi ai është larguar me mjetin e tij në drejtim të banesës së tij. Mbas largimit të Robertit, Gazmir Daci ka komunikuar në telefon me Valmir Kolaverin, i cili është edhe vëllai i Robertit. Biseda mes tyre ka qenë e tensionuar dhe e shoqëruar edhe më fjalë kërcënuese e fyese. Në përfundim të kësaj bisede, Gazmiri ka shkuar me mjetin e tij në drejtim të njësisë tregtare, ku mendonte se ndodheshin dy vëllezërit. Këta të fundit i ka gjetur në hapësirën përpara njësisë tregtare në fjalë e pranë një autoveture në pronësi të tyre. Në vazhdim e sipër të konfliktit, ai ka nxjerrë armën e tipit pistoletë, që kishte me vete dhe ka qëlluar me të në drejtim të Robert Kolaverit. Kur ky i fundit është rrëzuar në tokë dhe vëllai i tij, Valmiri, ka marrë një send të fortë në tokë, për t’u mbrojtur nga sulmi i armatosur i të pandehurit, por edhe ai është qëlluar në trup me armë nga i pandehuri dhe është rrëzuar në tokë. Për shkak të plagëve të marra, Valmir Kolaveri ka gjetur vdekjen, ndërsa vëllai i tij u është nënshtruar ndërhyrjeve operatore dhe u ka mbijetuar plagëve të marra. Mbas kërkimesh e gjurmimesh disaditore, në mbrëmjen e datën 22 dhjetorit 2015, Gazmir Daci, është kapur në një nga dhomat e një hoteli, që ndodhet në anë të autostradës Tiranë–Durrës. Në momentin e kapjes me vete i është gjetur edhe një armë brezi e tipit pistoletë e markës TT, si dhe një kartë identiteti e falsifikuar tërësisht, sepse ajo mbante fotografinë e tij dhe gjeneralitetet e shtetasit B.M. Nën akuzë u vunë edhe Xhelal Daci, babai i Gazmirit dhe Ezel Baja, për armëmbajtje dhe veprime që pengojnë zbulimin e së vërtetës. Konflikti mes palëve dyshohet se e ka zanafillën në një sherr të ndodhur në Francë, për prishje pazaresh për trafik klandestinësh.
