Çmimet e reja referencë të llogaritur nga Ministria e Financave luhaten nga 23.7 mijë lekë për m2 në gati 67 mijë lekë për m2
Në projektligjin për rivlerësimin e pronës, janë parashikuar tarifat e reja për çmimet e apartamenteve e trojeve, të ndara sipas zonave. Vlerat e apartamenteve luhaten nga 60 mijë lekë për metër katror në zonat periferike të Tiranës, deri në 190 mijë lekë për metër katror në zonën e ish – Bllokut. Sipas listës së hartuar nga specialist të pasurive të paluajtshme, pranë Ali Demit çmimi varion mes 80 deri në 98 mijë l për m 2. Në këto vlera është edhe qyteti studenti, ndërsa çmimi shtrenjtohet tek banesat afër Shkollës së Baletit, Pazarit të ri, dhe arrin në 187 mijë lekë për m2 pranë Ministrisë së Jashtme dhe tek stadiumi Qemal Stafa. Për apartamentet në zonën e Porcelanit, Kinostudio,e pranë spitaleve çmimi është mes 60-75 mijë lekë/m2. Në këto nivele çmimesh jemi edhe ne zonën e Kombinatit e pranë qytetit të nxënësve. Apartamentet në Unazën e re dhe fushën e Aviacionit vlerësohen me 65 mijë lekë për m2. Më pak se ish blloku, apo zona e Ministrisë së Jashtme vlerësohen apartamentet në qendër të Tiranës, në Rrugën e Durrësit, apo Blv. Dëshmorët e Kombit. Çmimet zyrtare të shitblerjes llogariten mes 100 deri në 145 mijë lekë për metër katror. Këto janë çmimet, që do të llogariten për efekt taksash në rast shitblerje të një apartamenti. Ligji i rivlerësimit që pritet të aplikohet nga shtatori deri në shkurt, parashikon që pronarët e apartamenteve, përmes ekspertëve vlerësues të nxjerrin çmimin e ri të apartamentit të tyre. Për vlerën shtesë që apartamenti mund të ketë krahasuar me çmimin e mëparshëm, ato paguajnë 2%, nga 15% që parashikohej më parë. E njëjta gjë vlen edhe për vlerësimin e trojeve. Çmimet e reja referencë të llogaritur nga Ministria e Financave luhaten nga 23.7 mijë lekë për m2 në gati 67 mijë lekë për m2.
