“Foli për arritjen e madhe, se ka dërguar ujë për vaditje atje ku nuk shkonte prej 20 vitesh. Po është e vërtetë, është uji që shkon për të vaditur parcelat me drogë, në vende ku nuk ishte parë e dëgjuar në këto 20 vite”
Ambrozia Meta
Kryedemokrati Lulzim Basha deklaroi ditën e djeshme se ekonomia vazhdon të pësojë rënie. Duke iu referuar shifrave zyrtare të kredititimit të ekonomisë, Basha u shpreh se situata vjen në përkeqësim. “Shifrat zyrtare te Bankës së Shqipërisë konfirmuan se kreditimi i ekonomisë në korrik 2016 ra 0.3% krahasuar me një vit më parë. Kjo ka ardhur si pasojë e uljes me 1.7% të kreditimit për bizneset. Krahasuar me një vit me parë, por edhe nga muaji ne muaj situata vjen në përkeqësim,’’ – tha shefi i selisë blu. Lideri opozitar theksoi se statistikat e fundit tregojnë se ekonomia dhe biznesi kanë hyrë në ciklin e zi të krizës së madhe. “ Gjatë muajit korrik kreditimi ra me 0.5% krahasuar me muajin qershor, dhe kjo si pasojë e uljes me 1.2% të kreditimit të bizneseve.Rënia e kreditimit do të thotë rënie e investimeve, më pak vende pune, më pak konsum, më pak prodhim. Të gjitha shenja se ekonomia dhe biznesi kanë hyrë në ciklin e zi të krizës së madhe. Vetëm në muajt maj dhe qershor 4 mijë biznese ndaluan aktivitetin.
Rënia e kreditimit është sinjali më i fortë i mosbesimit dhe panikut që ka mbërthyer ekonominë e biznesin,” – nënvizoi ai. Kreu demokrat bëri përgjegjës për krizën ekonomike korrupsionin qeveritar dhe biznesin e drogës. Ai komentoi edhe konferencën online të kryeministrit , dy ditë më parë, duke deklaruar se Rama krihet para kamerave ndërkohë që biznesi e ekonomia po shkrumbohen. “ Ekonomia dhe biznesi sigurisht do të njohin rënie e zvogëlim, sepse duhet të përballojnë dy realitete të paligjshme, ekonominë e biznesin e korrupsionit qeveritar dhe ekonominë e biznesin e drogës.Ekonomia e biznesi i ndershëm është drejt falimentimit sepse të gjithë tenderat, koncesionet, pasuritë e paratë e shqiptarëve i marrin një grusht oligarkësh, që janë fitues të paracaktuar si miq të Edi Ramës.Ekonomia e biznesi i ndershëm është drejt mbylljes së qepenave e në vend të tyre lulëzon biznesi i bandave të drogës të cilët fitojnë miliona euro cdo muaj në mënyrë të paligjshme, dhe kanë licencën e Edi Ramës në këmbim të taksës 30 përqind për çdo rrënjë.Edi Rama vazhdon të krihet para kamerave, ndërkohë që ekonomia e biznesi i vendit po shkrumbohen,” – theksoi kryeopozitari.
Qëndrimi
Lideri i të djathtëve, në reagimin e tij, u shpreh se ndërkohë që qytetet vuajnë mungesën e furnizimit me ujë, uji shkon për vaditjen e parcelave me drogë. “Foli për arritjen e madhe, se ka dërguar ujë për vaditje atje ku nuk shkonte prej 20 vitesh. Po është e vërtetë, është uji që shkon për të vaditur parcelat me drogë, në vende ku nuk ishte parë e dëgjuar në këto 20 vite. Peshkopia ka dy dite pa uje. Po kështu dhjetëra qytete e mijëra fshatra anembane vendit.Ky realitet i ka bërë shqiptarët më të vetëdijshëm se kurrë për keqeverisjen, për krimin e korrupsionin. Ka rrugedalje, ka shprese, ka zgjidhje. Largimi i të keqes që ka kapur peng vendin është hapi i parë.Shqipëria më mirë pa Edi Ramën,” – deklaroi kreu i partisë Demokratike.
