Dy shqiptarë u bënë protagonistë në SHBA në dy ngjarje të ndryshme që kanë pushtuar faqet e para të gazetave.
Fillimisht në mëngjes, mediat amerikane raportuan se një shqiptar, instruktor fluturimesh, është përleshur me një studentin e tij gjatë një fluturimi.
Instruktori Arian Prevalla u zu gjatë fluturimit me jordanezin Feras Freitakh.
Ky i fundit e rrëzoi avionin qëllimisht, duke humbur jetën vetë.
Për fat Prevalla mbijetoi dhe po e merr veten nga plagët.
Burimet hetimore thonë se rrëzimi i avionit nuk ishte një akt terrorist, por vetëm një akt i qëllimshëm vetëvrasje.
Mediat raportojnë se të dy janë zënë në avion për shkak se jordanezi ishte i pakënaqur me mësimet që po merrte për fluturimin.
Ndërkohë më vonë një tjetër shqiptar u bë protagonist.
Din Kosova kishte ngritur në një kodër në parkun e njohur “Joshua Tree”, një memorial rreth gjashtë metra të lartë me gurë dhe beton.
64-vjeçari shqiptar tha se e kishte ngritur memorialin në nderim të presidentit amerikan, Woodrow Wilson, që në Shqipëri shihet si një hero pasi mbrojti pavarësinë e vendit në fund të Luftës së Parë Botërore.
Por ndërtimi në këtë zonë është rreptësisht i ndaluar.
Për këtë arsye një gjykatë e ka dënuar me një gjobë prej 9 mijë dollarësh.
Gjykatësi David T. Bristol tha se ka ndjenja të përziera për dënimin e shqiptarit.
“Ndërtimi i një monumenti është diçka e lavdërueshme. Por ti e bëre atë në një park,” tha ai.
“Nuk e dija,” iu përgjigj shqiptari.
“E di, dhe më vjen keq për këtë,” tha gjyqtari.
Prokurorët ishin më të ashpër, kur i thanë se duhej ta dinte se është park.
Por Kosova tha se nuk pa gjëkundi kufinj.
Ai e nisi ndërtimin e memorialit në vitin 2011 dhe e përfundoi në kohë për 100-vjetorin e Pavarësisë.
Që prej atëherë, shumë njerëz e kanë vizituar memorialin.
Pak dinë për Shqipërinë, por Kosova është krenar.
“Njerëzit e shohin në kodër dhe duan të shkojnë. Mendoj se kam bërë diçka të mirë”, transmeton mapo.
Prokurorët thanë se mund të kërkonin edhe burg, pasi ligji e lejon, por e toleruan shqiptarin pasi ishte bashkëpunues.