Çuditë e ALUIZNI-t me legalizimin e ndërtimeve pa leje në Shqipëri kanë arritur deri aty sa ky institucion të legalizojë edhe ajrin. Bëhet fjalë për një pallat në Tiranë, ku ALUIZNI ka legalizuar një kat të tërë, i cili nuk ekziston. Madje, duke u bazuar në dokumentet e këtij institucioni, ky kat është edhe hipotekuar.
Banorët e pallatit nr. 1 në rrugën “Abdi Kazani”, pas Liceut Artistik janë ankuar se është legalizuar një pallat 10 katësh, i cili në të vërtetë është vetëm 9 kate, pra një kat nuk ekziston.
Fiks Fare kontaktoi me një nga pronarët e truallit ku është ndërtuar pallati, pikërisht Adrian Gjyshin, i cili shpjegoi sesi ka nisur kjo histori. Ai shpjegon historinë e ndërtimit të pallatit, që ka zanafillën në vitin 2000, kur një firmë ndërtuese, ka lidhur një marrëveshje me pronarët e truallit dhe ka marrë leje në Bashkinë e Tiranës për ndërtimin e pallatit. Por, duke qenë se ai ka devijuar nga leja, duke ndërtuar një kat shtesë, në vitin 2003 ai ka bërë kolaudimin e ndërtesës dhe e ka dërguar për legalizim të gjithë pallatin, pavarësisht se ndërtesa ishte me leje nga Bashkia.
Gjyshi vë në dukje se që këtu ka nisur falsifikimi i dokumenteve, pasi kolaudimi i pallatit është realizuar në vitin 2003, ndërkohë që koletatorja ka marrë licencën në vitin 2005 dhe në vitin 2007 është regjistruar në QKR. Pra çdo veprim është kryer në të kundërtën.
Për të vërtetuar pretendimet e banorëve dhe pronarëve, gazetarët e emisionit investigativ verifikuan katin e dhjetë të këtij pallati, i cili nga brenda duket sikur ekzistojnë gjashtë hyre. Hyjmë në disa prej tyre dhe shohim sesi është brenda ajo, duke u bazuar edhe në dokumentet e hipotekës, ndërkohë që në një prej hyrjeve të pretenduara është vetëm dhoma e ashensorit. Aty vihet re se nuk ka asnjë hyrje, veç dyerve kryesore dhe mureve rrethuese të tarracës.
Ndërkohë, Adrian Gjyshi tregon gjithashtu se pas konstatimit të legalizimit të një kati ajër janë përballur me kompaninë ndërtuese edhe në gjykatë, por të tre shkallët e gjyqësorit, i kanë dhënë të drejtë ndërtuesit, duke u bazuar te dokumentet false, pasi nuk është bërë asnjë verifikim në terren. Po ashtu, ai thotë se është bërë kallëzim në prokurori, por nuk dihet sesi është vepruar.
Për të mësuar sesi është legalizuar një kat shtesë ne shkuam edhe pranë ALUIZNI-t, por specialistët e këtij institucioni thanë se nuk mund të ndryshojnë asgjë për shkak të skadimit të afatit. Juristja Shpresa Muha rrëfen në një prononcim që anulimi i lejes së legalizimit mund të bëhet vetëm nëse ka një vendim të formës së prerë nga gjykata.
Fiks Fare u interesua pranë Prokurorisë së Tiranës për këtë çështje dhe nga verifikimet rezultoi se më 30 mars të vitit 2012 është bërë kallëzim sesi është legalizuar ky pallat. Pas regjistrimit të procedimit penal, prokuroria ka sekuestruar dosjen e legalizimit pranë ALUIZNI-t, Tiranë, por nuk dihet zyrtarisht sesi ka përfunduar ky hetim.
