Shirat e rrëmbyeshëm kanë rrezikuar seriozisht jetën e gjithë familjarëve të familjes së Medi Gjetanit në njësinë administrative Lis në Burrel.
Për të shpëtuar këtë familje në dispozicion është vënë një helikopter i Forcave të Armatosur, i cili ka arritur të nxjerrë gjallë e shëndoshë nga ky rrezik një të moshuar 85-vjeçare, një nuse të re dhe foshnjën e saj 5 muajshe.
Paradoksi më i madh mes kësaj gjurulldie qëndron në faktin që helikopterit i është dashur të qëndrojë 45 minuta në ajër, pasi djali i shtëpisë nuk pranonte që nusja e tij shtatzënë të hipte në një helikopter me “burrat e panjohur të forcave të armatosura”.
Po kështu, ai nuk pranonte që ata të shpëtonin as foshnjën e tyre 5-muajshe.
U deshën 45 minuta negociata, që babai të bindej, dhe të lejonte forcat e Ushtrisë të shpëtonin gruan dhe vajzën e tij, ndërkohë që banesa ishte “nën pushtetin” e ujit.
E derisa babai u bind, helikopterit të Ushtrisë iu desh të qëndronte 45 minuta në ajër. Por pavarësisht negociatave djali dhe babai i shtëpisë nuk pranuan të largoheshin me helikopter.
