Fotoja e një fëmije që shkon në shkollë duke mbajtur në kurriz çantën dhe në një dorë qesen me dru u bë virale dje.
Por për banorët e fshatrave në Kukës, aty ku është fotografuar dhe djali është jeta e përditshme dhe normaliteti.
Dimri ka trokitur prej ditësh dhe ngrohja me dru është primarja por në disa shkolla në fshatrat e Kukësit furnizimi me dru nga bashkia nuk ka ndodhur ende.
Dje ishte fotoja e djalit nxënës i shkollës 9-vjeçare “Vehbi Shehu”, Bicaj në Kukës.
Lesjani, banor i fshatit Cernalevë, ka fëmijën e tij që mëson në shkollën fillore Oreshkë, në varësi të shkollës 9 vjeçare Cernalevë dhe na kontaktoi për të përcjellë shqetësimin e tij.
“Çdo ditë të zë syri fëmijë të vegjël që në shkollë bashkë me çantën marrin dhe një krah dru. Apo prindër të cilët me karroca dore furnizojnë shkollën me dru” thotë ai
Shkolla nuk është furnizuar ende me dru nga bashkia dhe detyrohemi të çojnë vetë ata dru në shkollë me qëllim që të sigurojnë ngrohje për fëmijët tanë.
Nëse nuk e bëjmë ndërpritet mësimi, ose orët bëhen të shkurtuara duke bërë që fëmijët tanë të mos marrin njohuritë e duhura në orarin e duhur”
Jo vetëm kaq moti i keq me erëra dhe shi që goditi javën e kaluar gjithë vendin ka dëmtuar çatinë e shkollës dhe tashmë ajo është e mbuluar me llamarinë.
Pamjet që na ka përcjellë dhe fotot në redaksinë e Ora News tregojnë kushtet e vështira dhe të trishta ku këta fëmijë mësojnë.
Në videon që na përcolli, në klasë nuk ka asgjë veçse tre tavolina që janë vendosur ngjitur me njëra tjetrën, fëmijët e vegjël të ulur rreth saj, një raft llamarine, një sobë me dru dhe një karton ku janë numrat
Fëmijët qëndrojnë me xhupa dhe shall në klasë sepse është shumë ftohtë
” Kemi ftohtë në klasë” thotë një vajzë.
Deri më 15 nëntor bashkia duhet të përfundonte furnizimi me dru të të gjithë shkollave të qarkut. I kontaktuar nga Ora News një zyrtar i bashkisë së Kukësit tha se në fshatrat e thella malorë si Shishtavec, Grykçaj, Arren, Zapod është bërë furnizimi i shkollave me dru. Ndërsa sa i takon fshatit Cernalevë furnizimi me dru nuk është bërë ende pasi është e pamundur të shkojë makina sepse rruga është e keqe dhe do mundohen që transportin e druve ta bëjnë me kalë.
Lesjani na thotë se kjo vonesë e furnizimit me dru ndodh çdo vit dhe për ta e vetmja mënyrë që fëmijët të mos mbesin pa mësim është ti çojnë vetë ata.
Kushtet e mjerueshme te shkolles ku rrine femijet
Nje femije duke transportuar dru ne shkolle per t’u ngrohur
Catija prej alumini e shkolles
Nje prind qe transporton dru me karroce per ne shkollen e femijeve
Tavani me lageshtire i shkolles
Nje femije duke transportuar dru ne shkolle per t’u ngrohur
