Flasin me gjuhën e Skënderbeut dhe e kanë ruajtur kulturën me çdo formë e mjet.
Martino: Teatri është instrumenti më i rëndësishëm për të ruajtur sa më gjatë gjuhën tonë, gjuhën e Skëndërbeut.
Por sot gjuha e arbëreshëve është e rrezikuar. Lucia Martino, Presidente e Shoqatës “Vorea” në një intervistë për “Ora News” evidenton shqetësimin, pasi thekson se gjuha nuk mësohet në shkolla dhe flitet shumë pak nga të rinjtë.
Martino: Kam dy mbesa, nuk folin arbërisht, pasi nuk e mësojn ëmë në shkollë. Është e rëndësishme të bëjnë shkollë pasi vetëm kështu mund të kenë kontakt me gjuhën, pasi vetëm kështu unë them se mund të mos e harrojmë gjuhën dhe kulturën tonë.
“Bëni për ne”, është apeli direkt për autoritetet shqiptare për të evituar këtë rrezik.
Martino: Ne e ruajtëm për 500 vjet, tani ju bëni për ne.
Shqipëria për arbëreshët është e bukura, ku kthehen me mall, por sot sfidat janë të forta ndaj edhe kërkohet forcimi i bashkëpunimit në mënyrë që lidhja speciale të qëndrojë e forte.
Martino: Vetëm kështu mund të bëhemi bashkë dhe të ruajmë më shumë kulturën arbëreshe që është e juaja.
Gjuha dhe liturgjia sipas Martinos, kanë ndikuar në ruajtjen e kulturës arbëreshe, ndërsa evidenton çfarë kanë arbëreshët që shqiptarët e kanë humbur?
Martino: Ne kemi ca pjata që nuk nuk i keni më, kostumet. Gjuha arbëreshe është kopja origjinale, në shqip është fotokopja.
Muzikaliteti i gjuhës arbëreshe, gërshetuar me këngën dhe vallet tradicionale të përcjella brez pas brezi vjen në Tiranë si Odisea e gjatë e një populli që kthehet përsëri në tokën mëmë.
