Marjan Levanti, i cili disa ditë më parë plagosi me thikë ish-vjehrrin, ish-vjehrrën dhe ish-kunatin, në banesën e tyre, ka dëshmuar para Prokurorisë arsyen pse kishte shkuar tek ata natën e ngjarjes. Ai pretendon se ndaj djalit të tij të mitur është ushtruar dhunë nga gjyshi i tij, të cilin Levanti e plagosi me thikë pas konfliktit.
Pas kësaj, Prokuroria ka vendosur ta verifikojë këtë pretendim të Levantit për djalin e tij 7vjeçar.
Për këtë arsye mësohet se grupi i hetimit ka vendosur të kryejë një ekzaminim mjekoligjor te 7vjeçari, si dhe ta marrë në pyetje atë në prani të psikologut, raporton “Panorama”.
Gjatë dëshmisë së tij në lidhje me plagosjen e trefishtë, Marjan Levanti ka pretenduar se djali i tij 7vjeçar keqtrajtohej fizikisht nga ish-vjehrri, dhe thotë se pikërisht për këtë arsye, ka shkuar më datë 23 dhjetor 2016 te shtëpia e prindërve të ish-gruas dhe ka takuar fëmijët e tij. Pas këtij momenti, ndodhi edhe plagosja e trefishtë.
Sipas Prokurorisë, më datë 23.12.2016, pasdite rreth orës 19:00, në rrugën “Ilmi Aver”, në Tiranë, Marjan Levanti (bashkëshorti i shtetases Eleni Levantit), i cili prej rreth dy muajsh nuk jetonte me të shoqen dhe dy fëmijët (djalë e vajzë, të moshës 7 e 3 vjeç), për shkak të mosmarrëveshjeve mes tyre, ka shkuar në banesën e së shoqes – e cila jetonte në shtëpinë e të atit, Ferit K. (një ndërtesë private 4katëshe), dhe pasi ka takuar djalin e madh, është fshehur poshtë një krevati, në një prej dhomave të katit të dytë.
Pasi Eleni Levanti u kthye në banesë dhe u përball me ishburrin, ajo kërkoi ndihmën e familjarëve të cilët ndërhynë. Nga ngjarja mbetën të plagosur babai, nëna dhe vëllai i saj, si pasojë e goditjeve me thikë nga Marjan Levanti.
