Kryeministri Edi Rama, njëherësh kreu i PS-së, ka zgjedhur që para nisjes së Asamblesë Kombëtare të konsumojë një kafe me disa nga figurat kryesore të kësaj partie.
‘BalkanWeb’ ka siguruar disa foto ku shihet Rama, bashkë me kreun e PS-së për Tiranën, Saimir Tahiri si edhe kryebashkiakun Erjon Veliaj, për të cilët është përfolur shpesh herë për një ‘rivalitet’ mes tyre dhe që siç duket Rama ka vendosur t’i ‘sheshojë’ këto zëra.
Gazetarja Marsela Karapanco raportoi në një lidhje për ‘News24’ se fokusi kryesor u Asamblesë do jenë zgjedhjet e 18 qershorit, ndërsa pritet që në të vendoset formalisht thirrja e Kongresit Zgjedhor të PS-së në 29 prill.
Pjesëmarrës në Asamble do të jenë të gjithë eksponentët kyç të fushatës deri në nivelin më të ulët, kryetarët e njësive administrative, 61 kryetarët partie, 61 kryetarët partie, koordinatorët elektoralë.
Kryeministri Rama më herët ka bërë të qartë se ditën e asamblesë do të përzgjidhet dhe kandidatura zyrtare për kryebashkiak të Kavajes, pas shkarkimit të Elvis Rroshit, në kuadër të ligjit të dekriminalizimit.
