Pas përfundimit të fazës përgatitore në Ohër, Kamza u është rikthyer përgatitjeve në shtëpi. Kamzalinjëve u është dashur që menjëherë të përballen me kushte të vështira stërvitore. Ekipit i është dashur dje që të përgatitet në orën 14:00, në pikun e vapës, në Qendrën Kombëtare Stërvitore të FSHF-së në Kamzë.
Lojtarët kanë pasur probleme me frymëmarrjen, pasi, përveç temperaturës së lartë të ajrit, u është dashur të përballojnë edhe nxehtësinë dhe erën që çliron tapeti i fushës me bar sintetik. Në këto kushte, konsumi i ujit ka qenë i madh nga lojtarët. Ora 14:00 ishte orari i vetëm i lirë, kur Kamza mund të përgatitej dje në kompleksin e federatës, ndërsa sot skuadra do të stërvitet paradite, rreth orës 09:00
Demir Imeri – Gjatë seancës së djeshme skuadra ka qenë e plotë, madje nuk kanë munguar edhe prurjet e reja. Me Kamzën dje është përgatitur edhe futbollisti shqiptar nga Maqedonia, Demir Imeri. 21-vjeçari i lindur në Kërçovë, në sezonin e fundit ka luajtur me Shkëndijën e Tetovës dhe pritet që të jetë një përforcim i rëndësishëm për krahun e djathtë të ofensivës së Kamzës. Imeri ka qenë pjesë e kombëtareve të moshave të Maqedonisë dhe në sezonin e fundit ka veshur fanellën e Shkëndijës së Tetovës, me të cilën është përfaqësuar në Ligën e Europës. Imeri ka udhëtuar së bashku me ekipin e Kamzës nga Maqedonia dhe si fillim ai konsiderohet në provë te kamzalinjtë, me shpresën për të nisur një aventurë të re në futbollin shqiptar.
21-vjeçari ka nisur përgatitjet me ekipin dhe pritet që trajneri Ramadan Ndreu dhe drejtuesit e klubit shumë shpejt të thonë fjalën e tyre për lojtarin. Dëshirat e trajnerit Ndreu në mbyllje të merkatos kanë të bëjnë me afrimin te Kamza të një qendërmbrojtësi, dy mesfushorëve krahu dhe të paktën një sulmuesi.
