Taulant Xhaka nuk mundi dot të përjetonte të njëjtat emocione si më 27 shtator 2011, në rikthimin e tij në “Old Trafford”, atje ku mesfushori kuqezi debutoi në Champions kundër Mançester Junajtid. “Djajtë” fituan 3-0 falë golave të Felainit, Lukakut dhe Rashfordit mbrëmjen e së martës, ndërsa në ndeshjen tjetër të Grupit A, surprizën e bëri CSKA-ja e Moskës që përmbysi Benfikën brenda në Lisbonë.
Pikërisht kjo fitore e rusëve, për Xhakën tregon sesa rivalizuese do të jetë gara në këtë grup për një vend në 1/8-at. “Fitorja e CSKA-së tregon se gjithçka do të jetë shumë e ngushtë në grup”, tha Xhaka pas ndeshjes. “Ne duhet të marrim pikë në shtëpi, pak rëndësi ka nëse ato do të jenë një apo tre”.