Më shumë se 11 kg kokainë u gjetën nga policia italiane në shtëpinë e një 31-vjeçari shqiptar i cili jeton në rrugën “Don Giovanni Fornasini”, në zonën “Corticella” në periferi të Bolonjës.
Apartamenti u kontrollua të hënën nga efektivët, si pjesë e një hetimi më të madh, të koordinuar nga prokuroria, raportojnë sot mediat lokale.
Droga, kokaina me një pastërti të lartë dhe peshë prej 11.5 kg, u gjet e fshehur në një fund të dyfishtë në një dollap në banesën e Besian Elezajt.
Arrestimi i shqiptarit për akuzën e posedimit dhe shpërndarjes së drogës u cilësua i rregullt nga gjykata dhe Elezaj u la në arrest shtëpiak.
