Kryetari i Bashkisë së Tiranës Erion Veliaj, gjatë intervistës së sotme me Sokol Ballën në “Top Story” u orvat të justifikonte me argumenta shumë të dobëta dhënien e lejes për ndërtimin e kullave të reja shumëkatëshe pranë qendrës së Tiranës.
Në fillimet e tij kur sapo kishte marrë detyrën si kryebashkiak, Veliaj ishte shprehur se në Tiranë kishte mbi 3-4 mijë apartamente stok të pashitura dhe se gjatë qeverisjes së tij në kryeqytet, nuk do të kishte më ndërtime.
Por tani që KKRT-ja ka dhënë leje për plot kulla të reja, Veliaj e ka kthyer 180 gradë rrotën.
Pa shpjeguar se nga lindi e gjithë kjo nevojë ndërtimesh të reja në Tiranë dhe se cili është fati i 3-4 mijë apartamenteve stok, kryebashkiaku tha se këto ndërtime i përgjigjen nevojës për vend-parkime të reja pranë qendrës, pasi kullat në fjalë do të kenë nga 3-4 kate parkingje.
Ai tha gjithashtu se ndërtimet bëhen edhe nga kërkesat që kanë bizneset si për call-center-a të reja.
Këto justifikime janë absurde për dy arsye.
Së pari sepse parkingjet private me pagesë në të gjithë Tiranën, nuk janë zgjidhje por shtim problemi për mijëra banorë që nuk e përballojnë dot ekonomikisht kaosin urban të krijuar me bllokimin e Sheshit Skënderbej.
Gjithashtu duket hipokrizi që paska “boom” kërkesah për call-center-a, kur dihet fare mirë se shumë syresh u “riatdhesuan” në Itali, pas një ligji të vendit fqinj që i favorizon, duke lënë shumë të rinj shqiptarë pa punë.
Dhe kur dihet gjithashtu se investimet e huaja në Shqipëri gjatë qeverisë Rama kanë qenë thuajse zero.
Arsyet e vërteta të këtij “boom”-i ka shumë më tepër gjasa që të qëndrojne te burimet financiare të nëndheshme që kanë nevojë të pastrohen nëpërmjet pallateve.
Por Veliaj s’mund ta thotë këtë.
