Franca është gjysmëfinalja e parë për Kupën e Botës në Rusi 2018. “Gjelat” e drejtuar nga Didier Deschamps fituan pastër 2-0 në çerekfinalen ndaj Uruguait, një ndeshje të cilën nuk e vendosën asnjëherë në diskutim gjatë gjithë 90 minutave. Skuadra e Tabarez vuajti shumë mungesën e Cavanit, i cili nuk luajti për arsye dëmtimi, ndërkohë që në krahun tjetër Griezmann dhuron spektakël me gol dhe asist.
Kylian Mbappe kishte një mundësi të artë në minutën e 15-të, kur u gjend i lirë në zonë, por goditja e tij me kokë është e dobët, dhe përfundon mbi traversë. Uruguai përpiqet që të reagojë, dhe në minutën e 35-të, krijojnë një rast të rrezikshëm me Vecinon, i cili provoi me një goditje në hyrje të zonës. Franca kaloi në avantazh në minutën e 40-të, pas një goditje dënimi, Griezmann krosoi në zonë për Varane, i cili e shoqëroi mjaft bukur me kokë në rrjetë. Uruguai u përgjigj shumë shpejt me Caceres, goditja e të cilit me kokë u prit në mënyrë spektakolare nga Lloris, ndërkohë që më pas Godin goditi shumë keq shumë pranë portës.
Fraksioni i dytë nisi me Uruguain ne kërkim të golit, por “Gjelat” godasin sërish duke shënuar edhe një tjetër gol. Në minutën e 61-të, Grizmann goditi shumë fortë në hyrje të zonës, teksa portieri Muslera ka gabuar në mënyrë fatale, duke mos arritur që ta ndalë topin. Më tej Franca e ka të thjeshtë për të administruar rezultatin, ndërkohë që Uruguai nuk krijon asnjëherë rrezikshmëri në portën e Lloris. /Koha Jonë/
