Ditët e fundit, menjëherë pas propozimit të kreut të Partisë Demokratike Lulzim Basha për një Vetting në politikë, propaganda e Rilindjes ka bombarduar opinionin, se kjo nismë është e kotë pasi këtë proces do ta kryejë SPAK dhe BKH, menjëherë pas ngritjes së tyre.
Edhe mbrëmë në studion e Eni Vasilit, në emisionin e saj, “Open”, kryeministri Rama përsëriti disa herë se opozita dhe ish lideri i saj Sali Berisha është e frikësuar nga krijimi i SPAK dhe BKH, prandaj po kërkon që të krijojë tymnaja me nismën për vetimin e politikanëve.
Që nga nisja e Reformës në Drejtësi dhe deri mbrëmë në daljen e parë televizive të Ramës për këtë sezon, nga ana e Rilindjes nuk ka rreshtur asnjë ditë furia e propagandës, sipas së cilës opozita është kundër organeve hetimore të mësipërme.
Në qendër të këtyre akuzave si një “sabotues i madh” është vendosur më shumë se kushdo tjetër, ish-kryeministri Sali Berisha. Mediat pranë Ramës e kanë demonizuar figurën dhe rolin e tij kundër këtyre organeve të rëndësishme hetuese, deri në fantazi dhe shpifje të paprecedenta.
Por si qëndron e vërteta për rolin e Sali Berishës për krijimin e SPAK dhe BKH?
Të vërtetën e këtyre 2 viteve që është projektuar dhe formëzuar Reforma në Drejtësi e tregon pikërisht “babai i saj”, ambasadori amerikan në Tiranë Donald Lu.
Në intervistën e tij të fundit në Vizion Plus për Sokol Ballën ai zbulon për herë të parë, se çfarë qëndrimi ka mbajtur në mënyrë sistematike Berisha për këtë problem në bisedat konfidenciale.
Madje Lu thotë në intervistën e tij të fundit, se; nuk ka pasur njeri që e ka mbështetur krijimin e SPAK dhe BKH më fort se Berisha!
“Unë kam qenë shumë krenar që gjatë tre viteve e gjysmë kam kërkuar rregullisht takime me Dr. Berishën dhe ka pasur mirësinë të më lejojë të takohemi dhe t’i zhvillojmë këto diskutime. Kemi pasur disa diskutime shumë të mira mbi reformën e gjyqësorit. Më lejoni të them se nuk ka pasur njeri që e ka mbështetur krijimin e SPAK dhe BKH më fort. Është serioz për këtë. Dhe di që pjesë e arsyes pse Partia Demokratike votoi në favor të atij ligji ishte Sali Berisha”, ka zbuluar Lu për herë të parë, rolin deciziv të Berishës për Reformën në Drejtësi.
Kjo deklaratë nga njeriu që ka qëndruar prapa çdo lëvizjeje në formëzimin e kësaj reforme, shumëzon me zero propagandën 2 vjeçare të Rilindjes dhe mediave të tyre, sipas së cilës Partia Demokratike dhe Sali Berisha jo vetëm nuk e kanë dashur Reformën në Drejtësi, por edhe kanë bërë gjithçka për sabotuar atë. Syri.net
