Banorët e Astirit vijojnë rezistencën duke kundërshtuar vendimin e qeverisë për të prishur banesat pa marrë më parë dëmshpërblimin e plotë.
Protestuesit sot kanë hyrë në ditën e 16 të rezistencës së të tyre, ndërsa në orën 17:00 ata kanë njoftuar se do të mblidhen sërish në rrugë.
“Pa na dhënë 100 % të dëmshpërblimit, ne nuk tërhiqemi”, tha një nga protestuesit. Për të ndjekur nga afër protestën kanë zbritur në terren edhe përfaqësues të Avokatit të Popullit.
Një nga juristët e këtij institucioni deklaroi se ata po ndjekin rastin e një gruaje, e cila pretendon se është dhunuar nga policia , ndërsa qytetarja denoncimin e bëri drejtpërdrejt në News 24 dhe “BalkanWeb”
“Sigurisht që po e mbikëqyrim situatën Avokatja është prononcuar publikisht për rastin e dhunimit të një gruaje. Ne po mbledhin informacion, por po ndjekin edhe rastin e zonjës e cila tregoi se është dhunuar nga policia. Pikërisht për këtë kemi ardhur për të vëzhguar”, tha një nga përfaqësuesit e Avokatit të Popullit.
