Përmes një postimi në facebook, ish deputeti demokrat Agron Shehaj, është bërë pjesë e debatit mes Agron Tufës e deputetit Spartak Braho, debat i cili ka përfunduar tashmë në gjykatë.
“Ditët e fundit, ish-funksionarë e përsekutorë komunistë dhe pinjollë të tyre sulmuan ashpër shkrimtarin Agron Tufën. Në sulmet e tyre nuk janë druajtur fare t’i thurrin lavde komunizmit dhe atyre që shkatërruan qindra mijëra jetë dhe vranë lirinë e një kombi.”-shkruan Shehaj
“Që të vihej në këtë pikë u desh që të mos reflektohej kurrë mbi diktaturën vrastare enveriste, u desh që të mos u mbyllej rruga drejt pushtetit ish-drejtuesve dhe persekutorë komunistë, u desh të mos dekomunistizohej asnjeherë shoqëria jonë. U desh të heshtet dhe të lihen në harresë krimet çrrenjëzore të komunizmit dhe autorët e tyre, e mbi të gjitha, u desh të liheshin brezat e rinj të pas komunizmit në padije të plotë për këto krime.
Ndaj sot, si homazh për jetët e humbura në duart çnjerëzore komuniste, në shenjë respekti dhe reflektimi për vuajtjet e njerëzve si Agron Tufa, por edhe si garanci që të mos lejojmë ta humbasim përsëri lirinë dhe dinjitetin njerëzor duhet të flasim, të tregojmë, të dëshmojmë, të ndajmë, të shkruajmë dhe lexojmë për krimet e komunizmit. Një fillim i mirë mund të jetë faqja ëëë.kujto.al ku prej disa vitesh po ndërtojmë një arkivë të njerëzve të persekutuar dhe të vrarë nga komunistët.” përfundon Shehaj reagimin e tij.
