Agjencia Kombëtare e Barnave dhe Pajisjeve Mjekësore njofton profesionistët e shëndetit, si dhe pacientët, për një efekt anësor nga përdorimi i barit “Ranitidinë”, pasi në të është gjetur një lëndë që klasifikohet si kancerogjene, bazuar në disa teste laboratorike të kryera.
Në faqen zyrtare të Administratës Amerikane për Barna dhe Ushqime, si dhe të Agjencisë Evropianë të Barnave, është publikuar njoftimi lidhur me gjetjen e një lënde të njohur si NDMA e klasifikuar si kanderogjene në barnat “Ranitidinë” dhe “Zantac”. Agjencia Kombëtare e Barnave thotë se për momentin ka pasur vetëm tërheqje vullnetare nga tregu, nga disa prej firmave që janë prodhuese dhe distribuese të këtij bari.
Njoftimi është bërë edhe për Urdhrin e Farmacistit të Shqipërisë, si dhe Urdhrin e Mjekut, në mënyrë që për barin e rekomanduar apo përshkruar të jepet informacion për efektet anësore që mund të shfaqen te pacienti.
Gjithashtu, këshillohen pacientët që e marrin pa recetë “Ranitidinën” të zgjedhin një bar tjetër dhe nëse e marrin “Ranitidinën” me recetë, të ndërpresin marrjen e saj, të flasin me mjekun personal në mënyrë që ai t’iu përshkruajë një mjekim tjetër opsional.
Profesionistëve të shëndetit u kërkohet të përdorin formularin e raportimit në faqen zyrtare të Agjencisë Kombëtare të Barnave dhe Pajisjeve Mjekësore, për çdo efekt të padëshiruar që ata mësojnë, lidhur me barin në fjalë, ose dhe barna të tjera, dhe ta dërgojnë atë në adresën: farmakovigjilenca@akbpm.gov.al.
