Organizata e mbrojtjes së trashëgimisë kulturore, Europa Nostra, ka reaguar pas prishjes së Teatrit Kombëtar, duke i dërguar një mesazh Aleancës për Mbrojtjen e Teatrit Kombëtar.
Mesazhi është një vlerësim për qëndresën heroike të artistëve në mbrojtje të godinës.
Por në mesazh bie në sy një fjali.
“Besoj se Ambasadori i BE-së do të publikojë një deklaratë të BE-së. Na bëni të ditur kur kjo të ketë ndodhur”, shkruan Europa Nostra.
Në fakt, zyra e BE doli dje me një deklaratë, por kjo deklaratë sërish u shtohet dyshimeve të shumë protestuesve dje se ndërkombëtarët në Tiranë i kanë lënë në baltë.
Reagimet e shumta në rrjetet sociale e tregojnë këtë gjë. Në faqen e ambasadës amerikane u postuan qindra komente plot revoltim kundër prishjes së Teatrit Kombëtar, edhe pse ambasada nuk bëri asnjë koment.
