Një memorial për viktimat e komunizmit në Estoni, në kryeqytetin Talin, u dëmtua pasi persona të panjohur ende nga policia e përdhosën atë duke vizatuar yje dhe grafite të tjera në muret e monumentit.
Dëmtimi i monumentit për Viktimat e Komunizmit në Estoni (1940-1991) u konfirmua nga instituti historik i vendit, sipas një raporti nga agjensia e lajmeve BNS.
Instituti raportoi dëmtimin dhe bëri thirrje që të gjenden vandalët, pavarësisht motiveve. Monumenti u dëmtua edhe në nëntor 2018, disa muaj pas hapjes së tij.
Monumenti, i cili ndodhet pranë një memoriali të madh sovjetik dhe varreve të ushtarëve gjermanë, përbëhet nga mure të errëta të gdhendura me emrat e 22 000 estonezëve që u vranë, u burgosën ose u internuan gjatë pushtimit sovjetik të Estonisë midis viteve 1940 dhe 1953.
Gjatë Luftës së Dytë Botërore, Estonia u pushtua së pari nga Bashkimi Sovjetik, pastaj nga Gjermania e Hitlerit dhe më pas përsëri nga forcat sovjetike pas luftës, kur vendi u aneksua nga Bashkimi Sovjetik deri në 1991.
Qindra dhe mijëra estonezë ishin subjekt i dëbimeve masive nga Bashkimi Sovjetik dhe shumë vdiqën në kushte të vështira. Disa të dëbuar ishin në gjendje të ktheheshin në atdheun e tyre pas vdekjes së diktatorit sovjetik Josif Visarionoviç Stalin, në 1953.
