Me furgonin e mbushur me 15 klandestinë, një shofer i është arratisur forcave të 4 Policive për të mos u kapur në rrugët e Pogradecit. Ndjekja e frikshme nga Policia ka përfunduar me kapjen e A.Sh., 35 vjeç, nga Tirana.
Në automjetin e tij u zbuluan 15 emigrantë të paligjshëm, të cilëve ai u kishte premtuar përveç transportit për në Tiranë, kundrejt fitimit, edhe kalimin në vendet e Bashkimit europian.
Në momentin që policët i kanë kërkuar të ndalojë, 35-vjeçari jo vetëm që nuk është bindur, por ka shtruar shpejtësinë, duke e bërë të detyrueshme ndjekjen. Ai u arrit të kapej në afërsi të fshatit Blacë.
Policia e Korçës, ajo e Pogradecit, Policia Kufitare dhe Policia Rrugore prej javësh janë bashkuar në operacionin “Perimetri” për kapjen e emigrantavë të paligjshëm që transportohen fshehurazi me makina drejt Tiranës.
Dosja e A.Sh. i kaloi Prokurorisë të Rrethit Gjyqësor Pogradec për veprat penale “Ndihma për kalim të paligjshëm të kufijve, kryer në bashkëpunim” dhe “Mosbindja ndaj urdhrit të punonjësit të policisë së rendit publik”.
