Programet e nxitjes së punësimit të mbështetura financiarisht nga Qeveria e donatorët, jo vetëm nuk kanë qenë të efektshme në reduktimin e papunësisë, por edhe kanë shkaktuar një dëm të konsiderueshëm ekonomik në buxhetin e shtetit.
Nga auditimi i kryer në Shërbimin Kombëtar të Punësimit për dy vitet 2018-2019, Kontrolli i Lartë i Shtetit konstaton mungesën e monitorimit të projekteve të përfituara si rezultat i nxitjes së punësimit nga Drejtoria e Përgjithshme dhe strukturat rajonale, duke i shkaktuar dëm ekonomik buxhetit të shtetit dhe duke përdorur fondet publike pa ekonomicitet, efektivitet eficencë në vlerën 166 milionë lekë, afërisht 1.6 milionë dollarë.
KLSH evidenton 134,710,345 lekë kosto e pajustifikuar nga asnjë subjekt përfitues pasi edhe në dosjet e projekteve të përfituara, që u verifikuan nga grupi i auditimit të KLSH-së, në drejtoritë/zyrat rajonale, faturat e blerjes me tvsh që subjektet paraqesin janë blerje në funksion të aktivitetit që ata kryejnë dhe nuk ka në to asnjë indikator matje që këto blerje janë kryer për kostot e trajnimit të pu.pa sikurse është dashur të konsiderohen. ‘Këto subjekte e kreditojnë TVSH-në e blerjeve duke bërë rimbursimin e TVSH-së në shitje të deklaruar në sistemin tatimor, dhe nga ana tjetër për të njëjtat fatura blerjeje të tvsh-së marrin subvencion në vlerë 19,000 lekë për secilin punëkërkues të papunë të përfshirë në listëpagesën e sigurimeve, nga Buxheti i Shtetit.
‘Nga sa më sipër, mungesa e kontrollit të brendshëm dhe e monitorimit nga SHKP, mungesa e gjurmës së auditimit në mënyrë të vazhdueshme si dhe kreditimi i dyfishtë nëpërmjet faturave të blerjes i pa argumentuar, sjell një përdorim të fondeve të buxhetit të shtetit në rastin konkret të vlerës prej 134,710,345 lekë pa ekonomicitet, efektivitet dhe eficencë’, konkludon Kontrolli i Lartë i Shtetit.
