Në një intervistë gjatë mbrëmjes së sotme, anëtari i Kryesisë së Partisë Demokratike, Kreshnik Çollaku, ka folur rreth aktualiteti politik, si dhe ka hedhur dritë mbi takimin e Bashës me ambasadorët e trojkës në Tiranë.
Në emisionin ‘Padite me Xhaxhiun’, Çollaku shprehet se në momentin që Rama ka grisur marrëveshjen e 5 qershorit, opozita po mundohet që nëpërmjet konsultave me ambasadorët, mos të hedhë në erë zgjedhjet e ardhshme parlamentare.
“Po ndodh një ngjarje që nuk ka ndodhur kurrë më parë. Ka ndodhur që është grisur një marrëveshje 5 qershorit dhe ka ndodhur që të ndryshohet Kushtetuta në mënyrë të njëanshme si asnjëherë më parë. Është një ngjarje e paprecedentë, në një sjellje të tillë do të ishte një masë reciproke ku gjithçka të hidhej në erë dhe opozita të dilte në rrugë.
Por po ndodh një përpjekje ekstreme e përfaqësuesve të opozitës edhe në konsulta me ambasadorët, që e gjithë kjo dramë mos të shkojë deri në fund dhe të rrezikohen zgjedhjet e përgjithshme. E rëndësishme është që efektet e këtij dëmi të amortizohen, që do të thotë pasyrimi i tij në Kodin Zgjedhor të bëhet në bazë të marrëveshjes së arritur në 5 Qershor.
Përpjekja dhe meraku i ndërkombëtarëve është mos-kolapsimi i situatës. Edi Rama gris marrëveshjen me opozitën por gris në të njëjtën kohë dhe marrëveshjen me ndërkombëtarët. Është një hap larg drejt destabilizimit të vendit përpjekja për ndryshime të njëanshme”.- tha Çollaku.
