Nga sot në Shqipëri është futur në fuqi vendimi që të detyron që të mbash maskën kudo që të shkosh. Për çështjen e mbajtjes së maskave në ambientet e hapura, foli edhe mjekja shqiptare në Gjermani, Aurora Meta Dollenberg, e cila thekson se duhet të jemi pak fleksibël në lidhje me masat e rrepta.
“Në Gjermani, duke qenë se numri i rasteve të reja është në rritje, janë rritur masat mbrojtëse, por maska është vendosur të mbahet në zonat publike në metropole, në rastet kur distanca 1,5 metra është e pamundur të mbahet. Në ambientet e hapura, në natyrë, ku njerëzit mund të ruajnë distancën nuk është e detyrueshme mbajtja e maskës. Duhet të jemi pak fleksibël në lidhje me masat e rrepta që ushtrohen te popullata. Sa më shumë ta shtypim të drejtën për të dalë, aq më shumë njerëzit do të tentojnë ta shkelin rregullin. Nëse njerëzit qëndrojnë më shumë se 2 metra larg njëri tjetrit, maska nuk duhet të jetë e detyrueshme. Për sa kohë ky vendim prek të drejtat e njërit ka edhe vendim politik në të”, u shpreh Aurora Meta Dollenberg.
Teksa komentoi vendimin në Shqipëri për mbajtjen e maskave në të gjitha ambientet publike, mjekja u shpreh se ky është një deviacion nga protokolli i përgjithshëm që kemi nga OBSH. ”Ky deviacion është në dobi të shëndetit, por është diku më radikal se ne në vendet europiane”,- tha ajo më tej për ”A2cnn”.
