Ish-deputetja e Lëvizjes Socialiste për Integrim, një prej drejtuesve të kësaj force politike, në një intervistë të dhënë në Report Tv, ka folur sot për zgjedhjet në LSI, zhvillimet e fundit politike si dhe marrëdhënien e LSI me Presidentin e Republikës Meta.
E pyetur mbi mënyrën se si Meta po e drejton Presidencën dhe qëndrimet e tij politike, Gjosha shprehet se në një vend si Shqipëria që sipas saj ndodhet në situatë kaotike nuk mund ta mendonim një President që sillet si në vende normale.
Sa i përket rasteve kur shpesh skandalet për të cilat akuzohet mazhoranca sot ka shpesh një ish-ministër i LSI-së që përmendet, duke iu referuar këtu rastit të ish-ministrit Lefter Koka, Gjosha thotë se kjo është një pyetje për Ramën pasi z. Koka tashmë është në radhët e mazhorancës.“Mendoj që ministri për të cilin ju flisni sot është në radhët e mazhorancës dhe mund të pyesni Kryeministrin për të dhënë përgjigjet e tyre. Sot në radhët e LSI-së janë të rinj të jashtëzakonshëm, shumë aktiv, që e duan vendin dhe nuk kanë asnjë lidhje me abuzimet me pushtetin”, vijoi Gjosha.
Duke folur për procesin e zgjedhjeve në LSI, Klajda Gjosha tha se i gjithë ky proces online është një risi në politikën shqiptare.
“LSI është parti që gjithnjë sjell risi. Gjithmonë kemi pasur diçka te re por edhe për të treguar që ka mënyra të mira që ti mund ta afrohesh qytetarit në këto kohë që po kalojmë sot. Kohërat po shkojnë drejt inovacionit. Ne do të votojmë online si për kryetarin e LSI dhe anëtarët e Konventës Kombëtare por sigurisht që kemi edhe qendra të shpërndarë ku mund të votohet.
Nuk është çështje COVID por çështje risie. Edhe nëse nuk do të ishim në pandemi do ta zhvillonim në të njëjtën mënyrë. Ne e kemi përdorur gjithmonë teknologjinë dhe këtë herë jemi një hap më tej”, tha ish-deputetja e LSI-së.
Sa i përket faktit që Kryemadhi është e vetmja kandidate për Gjoshën sfida e zonjës Kryemadhi nuk ka mbaruar ende.
“Ne jemi ende një parti opozitare që do të duhet të provojmë forcën tonë por edhe të përfundojmë të gjithë aksionin tonë opozitar, që u nis nga zonja Kryemadhi. Dhe unë jam e bindur që do të kurorëzohet me fitoren e LSI–së në zgjedhje të ardhshme”,vijoi ajo.
Perceptimet në publik për një lidhje të mundshme organike mes LSI-së dhe Presidencës, Gosha i mohon totalisht.
“Z. Ilir Meta, që prej momentit të zgjedhjes si President, i ka shkëputur të gjithë marrëdhëniet me anëtarët e LSI dhe drejtuesit saj. Presidenti i Republikës është i vetmi institucion i pavarur sot. Z. Meta është aty për të ruajtur rolin thelbësor sot për të mbrojtur Kushtetutën si libri themelor dhe falë të cilit kemi të gjitha të drejtat sot. LSI nuk kas asnjë lloj mbrojtje nga z. Meta president. Ai është aty për të mbrojtur të gjithë qytetarët pavarësisht forcën politike që votojnë”, tha ajo në Report TV.
Gjosha, e cila ka mbajtur edhe pozicionin e ministres së Integrimit, foli edhe për integrimin evropian. Sipas saj Shqipëria nuk ka realizuar asnjë kusht për ecjen përpara me integrimin.
“Unë jam shumë dakord që Shqipëria nuk ka plotësuar asnjë kusht deri në këto momente. Shqipëria vazhdon të ketë 15 kushte për të realizuar. Kemi problemin e reformës zgjedhore pa konsensus pas prishjes së marrëveshjes së 5 qershorit dhe kemi dy gjykatat kryesore që duhen plotësuar”, tha ndër të tjera Klajda Gjosha.
