Presidenti Ilir Meta ka mbërritur në takimin e 10-të të Udhëheqësve të Procesit të Brdo-Brijunit, që organizohet në qytetin Brdo të Sllovenisë.
Meta tha se është “kënaqësi të marr pjesë sot në Takimin e 10-të të Udhëheqësve të Procesit Brdo-Brijuni, që organizohet në Brdo, Slloveni. Faleminderit Presidentit Pahor dhe Presidentit Milanoviç për organizimin dhe mikpritjen e ngrohtë.”
Përvjetori i 10-të i Takimit të Udhëheqësve të Procesit të Brdo-Brijunit do të mbahet në Qendrën e Kongresit të Brdos në Kranj. Në këtë takim do të jenë të pranishëm edhe presidentët e vendeve të rajonit. Nga Kosova ka shkuar Presidentja Vjosa Osmani dhe nga Serbia, Presidenti Aleksander Vuçiç, siç shihet në foto.
Kreu i Shtetit do të mbajë një fjalim gjatë këtij Samiti, si dhe do të zhvillojë takime zyrtare dypalëshe me homologët pjesëmarrës në këtë proces shumë të rëndësishëm për bashkëpunimin rajonal.