Pas divorcit, Angelina Jolie dhe Brad Pitt, prej dy vitesh janë në një betejë të ashpër gjyqësore në lidhje me kujdestarinë e fëmijëve të tyre.
Avokatët e Jolie, paraqitën një dokument në dhjetor të 2020-ës, ku thuhej se tre nga gjashtë fëmijët e saj me Pitt, donin të dëshmonin kundër tij gjatë procedurave, shkruan “US Weekly”.
Ish-çifti ndajnë bashkë fëmijët: Maddox, 19, Pax, 17, Zahara, 16, Shiloh, 15 dhe binjakët Knox dhe Vivienne, 12.
“Fëmijët, kujdestaria e të cilëve është në diskutim, janë mjaft të rritur për të kuptuar se çfarë po ndodh“,- shkruhet në dokumentin e marrë nga “US Weekly”.
“Gjyqi do të ndikojë domosdoshmërisht tek ta emocionalisht. Tre nga fëmijët kanë kërkuar të dëshmojnë.”
Dokumenti u paraqit si pjesë e përpjekjes së vazhdueshme të Jolie për të larguar gjyqtarin John Ouderkerk nga çështja, për shkak të lidhjeve të tij të pretenduara me ekipin ligjor të Pitt. Avokatët e aktorit argumentuan se fëmijët as që duhej të ishin vendosur në pozitë që të dëshironin të dëshmonin.
Maddox, i cili është 19 vjeç, pra nuk është i mitur, dëshmoi kundër babait të tij në mars.
Ai nuk e përdor ‘Pitt’ si mbiemrin e tij në dokumentet që nuk janë të ligjshme, por përdor Jolie. Maddox dëshiron të ndryshojë ligjërisht mbiemrin në Jolie, gjë të cilën Angelina ka thënë se nuk e mbështet.
