Deputeti i zgjedhur i Partisë Demokratike në Durrës, Ferdinand Xhaferraj ka akuzuar qeverinë për projektin e transformimit të portit të qytetit bregdetar.
Tre janë shqetësimet e Xhaferrajt.
E para se mbi çfarë studimi po zhvendoset porti ekzistues, e dyta çfarë do të ndodhë me kreditë që kanë financuar institucionet ndërkombëtare në terminale dhe së treti çfarë do të bëhet me koncesionet në këtë port.
Ai tha se PD nuk është kundër projekteve të zhvillimit të qytetit, por kërkoi transparencë.
Fjala e Xhaferraj:
Pra sikurse e pamë dy ditë më parë Rama hodhi për konsum mediatik maketin e ri të portit të Durrësit. Përsëri dhe si gjithmonë pamë një prezantim “3D”. Por nisur nga rëndësia që ka porti i Durrësit, rëndësi strategjike, ne si PD kemi kërkuar dhe do të vazhdojmë që të kërkojmë transparencë për disa problematike që janë shumë të ndjeshme.
Së pari qytetarët e Durrësit dhe të gjithë Shqipërisë nuk e dinë se mbi çfarë studimi po zhvendoset porti ekzistues, ku do të shkojë, si do të shkojë, kur do të shkojë dhe si do të jenë kapacitete.
Së dyti janë disa institucione ndërkombëtare që kanë financuar për ndërtimin e infrastrukturës, Banka Europiane kanë financuar 17 mln euro për të ndërtuar terminalin e kontejnerëve.
BERZH dhe Banka Europiane e Investimeve kanë financuar 32 mln euro për terminalin e trageteve dhe Banka Botërore 13 mln dollarë. Kush do i paguajë këto kredi?
Për të qenë të sinqertë problemi financiar është më i vogli, pasi problemi më i madh është që kryeministri Rama po çmonton lidhjet me institucionet Europiane dhe po na monton lidhje me ato lindore, po na largon nga rruga drejt BE-së.
Dhe së treti çfarë do të bëhet me koncesionet në këtë port, janë kompani gjermane që kanë terminalin e kontejnerëve dhe trageteve, çfarë do të bëhet? Kur qeveria 2-3 vite më parë donte të gllabëronte një nga këto koncesione, ambasadori gjerman erdhi në port.
Çfarë do të ndodhë apo përsëri shqiptarët do të paguajnë në Arbitrazh papërgjegjshmërinë e kryeministrit.
Ne si PD nuk jemi kundër projekteve që zhvillojnë qytetin, por kundër iniciativa të tilla pa studime dhe transparencë. Kemi parë një maket dhe një darkë te “Nusreti” dhe si është gllabëruar kjo godinë këtu, u është dhënë arabëve pa asnjë vendim. I kërkojmë drejtësisë së re që të veprojë, mbi çfarë kuadri është transferuar kjo godinë që njihet si “godina me xhama”.
Duket qartë se porti i Durrësit po përdoret si lavariçe e parave të ndotura të rilindjes.
Kur gjërat bëhen pa projekte, pa transparencë, pa ligj në mënyrë të padiskutueshme shkohet te lavatriçja.
Nuk do të kemi port të ri këtu, por vila nga Ura e Dajlanit deri këtu dhe përpara do të parkohen jahte, është thjesht një marrëdhënie biznesi, nuk do të ketë port, vila për biznes dhe në det do të parkohen jahtet, kjo është e gjithë historia.
