Ministrja e Arsimit, Evis Kushi ka bërë me dije se sapo është miratuar Udhëzuesi i hartuar nga Agjencia për Sigurimin e Cilësisë në Arsimin Parauniversitar.
Sipas ministres, përmes këtij Udhëzuesi do u mundësohet nxënësve një përsëritje dy javore e programeve mësimore të cilat i kanë humbur gjatë vitit shkollor për shkak të situatës së krijuar nga Covid-19.
Gjithashtu, Kushi u ka bërë thirrje të gjitha organeve të marrin masat e duhura në mënyrë që infrastruktura e shkollave të jetë gati më 1 shtator për të pritur nxënësit.
“Të dashur nxënës, mësues dhe prindër,
Pas një konsultimi me Këshillin Kombëtar të Arsimit Parauniversitar, me mësues, prindër, si dhe ekspertë të arsimit, dua t’ju informoj se sapo kemi miratuar Udhëzuesin e hartuar nga Agjencia për Sigurimin e Cilësisë në Arsimin Parauniversitar (ASCAP) “Për përmirësimin e arritjeve të nxënësve si pasojë e situatës së krijuar nga pandemia COVID-19″. Qëllimi i tij është që t’i mundësojë nxënësve për një periudhë dyjavore në fillim të muajit shtator 2021 të përsërisin, përforcojnë apo përmirësojnë njohuritë e tyre lidhur me mangësitë e identifikuara gjatë vitit të kaluar shkollor.
Përsa u takon temave që do të zhvillohen, ato do të jenë në formën e konsultimeve dhe në varësi të nevojave të identifikuara për çdo shkollë. Në këtë kuadër, nxënësit janë të lirë t’i ndjekin sipas nevojave të tyre, ndërsa prindërit janë të lutur të bashkëpunojnë për realizimin me sukses të këtij procesi.
Duke vlerësuar maksimalisht angazhimin dhe përkushtimin e tyre përgjatë një viti të vështirë, mësuesit që do të zhvillojnë temat e përsëritjes gjatë kësaj periudhe do të paguhen me orë shtesë. Ndërkohë, me qëllim zhvillimin e një procesi sa më optimal, kërkojmë nga organet e vetëqeverisjes vendore që të marrin masat e duhura në mënyrë që infrastruktura e shkollave të jetë gati për datën 1 shtator 2021” shkruan Ministrja në postimin e saj në “Facebook”.
