Bruksel – Muaji i kaluar ishte një nga korrikët më të nxehtë në botë të regjistruar, i treti pas korrikut të vitit 2019 dhe atij të 2016-ës, me temperatura jashtëzakonisht të larta të shënuara në disa rajone që nga Finlanda deri në Shtetet e Bashkuara, thanë të enjten shkencëtarët e BE.
Ai është piketa më e fundit në një trend të ngrohjes afatgjatë që i sheh shtatë vitet e fundit të renditen si më të nxehtat në botë të regjistruara, pasi emetimet e gazrave serë e ndryshojnë klimën e planetit.
“Kur shikojmë temperaturat globale, ka ndryshime nga viti në vit apo edhe muaj në muaj,” tha Freja Vamborg, shkencëtare e lartë në “European Union’s Copernicus Climate Change Service” për Reuters.
“Por në fund të fundit, gjëja kryesore që ne shohim është një prirje e ngrohjes në nivel global, dhe në shumicën e rajoneve të botës.”
Regjistrimet e Kopernikut kthehen në 1950, por kontrollohen me grupe të tjera të dhënash që datojnë që nga mesi i shekullit të 19-të.
