Qytetarë të shumtë janë duke reaguar kundër një vendimi të kompanisë amerikane “Apple” për të skanuar fotografitë e telefonave që zotërojnë.
Gjiganti teknologjik bëri me dije pak ditë më parë detajet e një sistemi për të gjetur material që mund të kenë lidhje me abuzimin seksual të fëmijëve në pajisjet që zotërojnë konsumatorët në Shtetet e Bashkuara të Amerikës. Kanë qenë të menjëhershme reagimet e qytetarëve që thonë se kjo është shkelje flagrante e privatësisë së tyre.
Ekspertët e Apple-it thanë për mediet amerikane se përpara se fotografia të ruhet në galerinë e telefonit, ky sistem i ri teknologjik do të kërkojë nëse ka material që ka lidhje me abuzimin e të miturve. Për më tepër, kompania private njoftoi se nëse identifikohet diçka e tillë, atëherë përdoruesi i telefonit do të raportohet te ndonjë zyrtar për zbatim të ligjit.
Debati për këtë rast në mediet amerikane është lidhur edhe me bllokimin e presidentit Trump në rrjetet sociale. Sipas shumë kritikëve të gjigantëve teknologjikë në Amerikë, kompanitë private po ndërhyjnë gjithnjë e më shumë në jetën private dhe përzgjedhjet e tyre me algoritmet dhe programet që kanë ndërtuar. Një shqetësim tjetër është se kjo teknologji mund të përdoret nga qeveritë autoritare për të spiunuar qytetarët.
Apple ka thënë se versionet e reja do të ndihmojnë që të mos përhapen materialet abuzuese online. Sistemi funksionon duke krahasuar fotografitë me një databazë nga Qendrat Kombëtare për Fëmijët.
