Nuk ka ende asnjë gjurmë nga minatori 61 vjeçar i cili është zhdukur prej më shumë se 4 ditësh tashmë.
Kryetari i Bashkisë së Bulqizës është kujtuar të reagojë për fatin e 61 vjeçarit vetëm ditën e sotme. Në një status në Facebook, ai ‘lutet që minatorin ta nxjerrin shëndoshë e mirë dhe t’i bashkohet familjes’.
Postimi i Lefter Alles:
I shqetësuar pafundësisht për situatën rreth kërkimeve të minatorit Muharrem Plaku.
Çdo punë dhe angazhim i yni është për të mirën e qytetarëve tanë, por jeta e secilit prej tyre, në qytet apo në fshat, kudo qoftë, vlen më shumë se gjithçka tjetër.
Lutem që ekipet e kërkimit të arrijnë sa më parë tek Muharremi dhe ta nxjerrin atë shëndoshë e mirë, ta bashkojnë me familjen e të afërmit e tij, dhe t’i japin fund shqetësimit dhe ankthit që ka pushtuar të gjithë bashkëqytetarët tanë, e jo vetëm.
Ndërkohë kujtojmë se minatori 61 vjeçar Muharrem Plaku, u bllokua në galerinë ku po punonte pasi një masiv minerar u shemb duke bërë që prej 4 ditësh ende të mos kemi lajm prej tij.
Lidhur me këtë ngjarje të rëndë ditën e djeshme reagoi edhe sindikata e bashkuar e minatoreve të cilët akuzuan qeverinë se nuk po i jepte vëmendjen e duhur këtij rasti.
Lidhur me kërkimet, Rrapush Tola, Drejtor i Autoritetit Kombëtar për Sigurinë dhe Emergjencat në Miniera u shpreh diten e djeshme se vijon puna për gjetjen e tij, por zona është e vjetër dhe rrezikon të shembet.
