Deputetja e Partisë Demokratike Sorina Koti, ishte pjesë e grupit të deputetëve të Komisionit të Rithemelimit të PD, e cila nuk u lejua të futej sot në selinë e PD-së.
Ajo u shpreh për “Ora News” se kjo situatë është e paprecedente dhe se gjithçka po i dukej një shaka e hidhur pasi ishte hera e parë që derës së selisë blu i vihej çelësi.
“Sot menduam të shkonim në seli. Është shtëpia jonë dhe e të gjithëve. E gjetëm veten të papërgatitur se nuk menduam që dyert e partisë tonë do të ishin të mbyllura. Ultimatumi mbaron në 24 të ditës së sotme. Ultimatumi në parim do të thotë që të respektohet vendimi i marrë nga anëtarësia. Kur demokratët vendosin për diçka jemi të detyruar që ta respektojmë. Ishte hera e parë që dera e partisë ishte e mbyllur. Mendoja se ishte një shaka”, u shpreh deputetja e PD-së.
