Deputeti demokrat Ervis Salianji ka reaguar në rrjete sociale pas deklaratës së kryeministrit Edi Rama i cili tha paraprakisht se do të lejojë legalizimin e kanabisit. Salianji shprehet se askush nuk mund të faturojë shqiptarët për një kosto që e ka të gjithën personale.
Deputeti i PD thotë se kanabizimi s’mund të jetë një faturë që duhet ta paguajnë shqiptarët nga e cila do përfitojë kryeministri Edi Rama. Më tej, Salianji thekson se Rama është njeriu që përtej çdo paralajmërimi të ndërkombëtarëve, i dha mundësinë dhe hapësirën çdo trafikanti pa dhe me uniformë të kanabizojë Shqipërinë.
Statusi i plotë i Salianjit
Kanabizimi nuk mund të jetë një faturë që duhet ta paguajnë shqiptarët dhe nga e cila të përfitojë Edi Rama. Sot me një vendim të parashpallur, Edi Rama i tha shqiptarëve se do të lejojë përdorimin e kanabisit mjekësor.
Njeriu që për 8 vite kanabizoi çdo pjesë të territorit! Njeriut që i janë faktuar lidhjet me grupe kriminale dhe për këtë ka dhe drejtues pas hekurave të përfshirë në çështjet e trafikut të narkotikëve.
Njeriu që përtej çdo paralajmërimi të ndërkombëtarëve, i dha mundësinë dhe hapësirën çdo trafikanti pa dhe me uniformë të kanabizojë Shqipërinë, sot ka zgjedhur tjetër rrugë.
Asnjë qëllim të mirë nuk ka kjo nismë. Edi Rama thjesht po përgatit një territor shumë të sigurt për grupet kriminale, për të kultivuar lirisht në Shqipëri kanabis.
Në 8 vite, Partia Demokratike dhe ne si ligjvënës kemi denoncuar lidhjet e qeverisë me krimin e organizuar në trafikun e lëndëve narkotike. Ndaj sot askush nuk mund të faturojë shqiptarët, për një kosto që e ka të gjithën personale!
