Në fjalimin e tij në Kuvend, kreu i zgjedhur i PD-së, Sali Berisha, tha se në Shqipëri sot janë dy armiq të fjalës së lirë.
Ai tha se ata janë Edi Rama dhe Erion Veliaj.
“Narkoshteti është në vetvete shteti shtypës i lirive në seri dhe i lirisë së medias në veçanti. Janë të zakonshme aktet banditeske të qeveritarëve ndaj gazetarëve dhe medias së lirë. Janë të zakonshme sulmet agresive staliniste të qeveritarëve ndaj medieve që shkruajnë kundër tyre.
Dy janë armiqtë e fjalës së lirë në Shqipëri. Njëri quhet Edi Rama, i cili përveç sjelljes së dhunshme verbale, përveç fyerjeve, ndëshkimeve absurde ndaj gazetarëve për shkak të pyetjeve që i bëjnë, ai krijoi edhe Ministrinë e Dizinformimit, i frymëzuar nga regjimet autokratike. Përgatiti ligjet për të dënuar të gjitha portalet që nuk i nënshtrohen atij, ndërmerr sanksione dhe ushtron presion mbi pronarët e medieve në rast se linjat editoriale të tyre nuk përputhen plotësisht me të qeverisë.
Edi Rama i lejon vetes të përdorë fyerjet, sharjet, kërcënimet ndaj gazetarëve për të cilat do ta kishin lakmi edhe etërit e tij, ish-xhelatë të fjalës së lirë. Me fjalorin e tij, ai është bërë i famshëm edhe në Europë, me ndëshkimin që u bën gazetarëve për pyetjet që nuk i pëlqejnë, deri te reminishencat e shprehjes së gjyshes së tij. Në fakt është atribut personal i gjyshes së tij, që një njeri me një kulturë mizerabël, e gjithë pasuria e tij bazohet te filmat e Kinostudios ‘Shqipëria e re’.
Po kaq armik i fjalës së lirë është edhe Erion Veliaj. Ai përbën variantin më të shëmtuar të zyrtarit, të qëndrimit ndaj fjalës së lirë, ndaj gazetarëve, ndaj pronarëve të medias. A mund të imagjinoni ju që këta të dy vijnë nga shoqëria e hapur e Xhorxh Sorosit. Ata janë fabrikate të Shoqërisë së Hapur, e cila për definicion duhet të jetë e kundërta,” tha Berisha.
