Rusia kritikoi sot dëbimin e 70 diplomatëve rusë nga Bullgaria, duke thënë se është bërë me urdhër të forcave të jashtme.
“Këto forca të jashtme nën pretendime të rreme përpiqen të vendosin shtetet evropiane me Rusinë, të manipulojnë në mënyrë cinike qeveritë dhe politikanët e varur, të shkatërrojnë gjithçka që është krijuar në kontinentin evropian për dekada të tëra”, tha zëdhënësja e Ministrisë së Jashtme të Rusisë, Maria Zakharova në një konferencë për mediat në Moskë.
“Vendimi ishte përpjekje nga Parlamenti dhe kabineti bullgar për t’i dhënë goditje shkatërruese marrëdhënieve me Rusinë dhe mekanizmave të mbetur të dialogut dypalësh”, tha ajo.
Bullgaria të martën tha se do të dëbojë 70 staf diplomatik rus për “punë kundër interesave të Bullgarisë”.
Duke iu kthyer Ukrainës, zëdhënësja përsëriti se ushtria ruse goditi një depo armësh dhe jo një qendër tregtare në qytetin ukrainas Kremenchuk dhe se qendra tregtare mori flakë pasi municioni filloi të shpërthejë.
Ajo vuri në dyshim vendimin e autoriteteve ukrainase për të ndërtuar një depo municioni pranë një qendre tregtare.
“Kjo është ajo që ne e quajmë fshehja pas shpinës së civilëve, duke i përdorur ata si mburojë, pengje të interesave gjeopolitike”, tha Zakharova.
Ajo shtoi se dërgesat perëndimore të armëve në Ukrainë kanë krijuar kërcënime për bashkësinë globale pasi armët mund të përfundojnë në tregjet e zeza.
“Agjencitë e zbatimit të ligjit të një numri vendesh të Evropës Perëndimore dhe Lindore kanë vërejtur tashmë rritje të konsiderueshme të vëllimit të trafikut kriminal të armëve që vjen nga territori i kontrolluar nga Kievi”, tha ajo.
Ajo paralajmëroi se të gjitha armët e furnizuara në Ukrainë “do të kthehen përmes tregut të zi në Evropë”.
Zakharova tha se Perëndimi pengon artificialisht “operacionin ushtarak special” të Rusisë duke ofruar mbështetje ushtarake dhe politike për Kievin.
Lidhur me dhënien e statusit të vendit kandidat për në BE nga Brukseli për Ukrainën, ajo tha: “Ky në fakt është shembull tjetër i veprimeve të regjimeve perëndimore për të përdorur Ukrainën si një mjet për të penguar Rusinë. Ajo nuk ka të bëjë fare me zhvillimin e ekonomisë së saj apo të rajonit në tërësi, zhvillimi i institucioneve financiare ose demokratike”.
Duke komentuar eksportet e grurit nga Ukraina, Zakharova tha se Rusia nuk do të përmbahet nga kjo dhe është e përgatitur të eksportojë miliona tonë drithëra të veta nëse Perëndimi ndalon bllokimin e dërgesave të ushqimit.
“Nëse Perëndimi është i shqetësuar për fillimin e urisë në botë, atëherë duhet të ndalojë bllokimin e furnizimeve me ushqim”, tha ajo.
Zakharova kritikoi deklaratën e ministres së Jashtme gjermane, Annalena Baerbock se Rusia po përdor ushqimin si armë, duke theksuar se taktika të tilla ishin më të zakonshme në Gjermaninë naziste.
“Baerbock nuk po gënjen vetëm, ajo gënjen paturpësisht, në mënyrë cinike për të lënë në harresë se ishte vendi i saj që historikisht përdori urinë si armë dhe mori njerëzit si pengje, duke shkatërruar civilët”, tha Zakharova.
